Мерекелік концертті Жітіқара қаласының Мәдениет сарайының @jitiqara.akimdigi өнерпаздары ашты. Одан кейін Андрей Коротченко жетекшілік ететін «Мирас» Мәдениет үйінің «Караван» вокалды-аспаптар ансамблі өнер көрсетті. Биыл шығармашылық ұжымның құрылғанына 15 жыл толып отыр. Музыкалық кеш барысында көрермендерге көпшілікке танымал әндермен қатар, тыңдарман жүрегінен орын алған шығармалар орындалды.

 

Мерекелік бағдарламада «Алтын микрофон» байқауына Астанадан келген жас өнерпаз Адиль Бектұрсынның өнер көрсетуі де ерекше әсер қалдырды. Жас әнші Димаш Құдайбергеннің орындаушылық мәнеріне жақын вокалымен көрерменнің назарын аударды. Байқаудың екінші кезеңіне өте алмағанына қарамастан, оның өнері көпшіліктің ыстық ықыласына бөленді.

 

Концерттің келесі бөлігінде қалалық «Jas star.kst» шығармашылық байқауының финалистері мен жеңімпаздары сахнаға шықты. Жас вокалистер мен би ұжымдары заманауи әрі эксперименттік қойылымдарын ұсынып, көрермен көңілінен шықты.

 

Кеш соңында Қарағандыдан келген «Ветер перемен» кавер-тобы өнер көрсетіп, шығармашылық бағдарламасын Юрий Шатуновтың әндеріне арнады.