Қостанайда қала күні әдеттегідей тамыз айында тойланады. Биыл шаһардың 147 жылдығын мерекелейміз.
Қала әкімінің орынбасары Мәжит Шүленов дүйсенбілік аппарат кеңесінде айтулы күннің мәдени бағдарламасын таныстырды. Оның айтуынша, көңілді концерттер тек қала орталығында ғана емес, шағын аудандардың тұрғындарына да қолжетімді болуына ерекше назар аударылған. Барлығы 30-дан астам іс-шаралар жоспарланып отыр.
— «Бағдарламаны дайындау барысында біз қала күнін концерттік іс-шаралар ғана емес, барлық жастағы тұрғындарды біріктіретін, әр адамның талғамына сай алаң табуға мүмкіндік беретін ерекше формат әзірлеуге тырыстық. Қостанайдың мәдени бірегейлігін, оның бай тарихын, заманауи жетістіктері мен даму перспективаларын баса көрсететін ауқымды қоғамдық оқиға ретінде өткізу міндетін қойдық», – деп түсіндірді ол.
Әкімдік ұсынған бағдарламаға қысқаша шолу жасар болсақ, жоспарлы кештер 14-тамызда ресми бастау алады. Сол күні Сити-орталықта ARTBAZAR атты қолөнер шеберлерінің жәрмеңкесі өтпек.
«Ботай – Ұлы дала мәдениеті» деген атаумен Солтүстік Қазақстан облысының музейі көшпелі көрме ұйымдастырады. Әйгілі энеолит дәуірінің археологиялық ескерткішіне жататын ежелгі Ботай қонысының тарихы көрушіге қызықты болары сөзсіз. Кітап көрмелері облыстың 90 жылдық мерейтойына арналмақ. Ол жерде танымал авторлардың еңбектерін өндірушілердің бағасымен сатып ала аласыз. Күндіз Байтұрсынов көшесінде «Kostanay Book Fair» кітап көрмесі есігін айқара ашпақ. Белгілі ақын, ҚР жазушылар одағының мүшесі Ақылбек Шаяхметтің кітабының тұсаукесері, қостанайлық авторлар Серікбай Оспанов, Александра Суслова, Абылай Мауданов пен өлкетанушы Шөптібай Байділдинмен кездесулер өткізу жоспарланып отыр. Қаланың Құрметті азаматы атағын табыстау рәсімі де жылдағы дәстүрден танбай, өз кезегімен ұйымдастырылмақ.
— «Маңызды іс-шаралардың бірі ретінде – балалар арасында құқықтық сауаттылық пен жол қозғалысы кезіндегі қауіпсіз мінез-құлық мәдениетін қалыптастыруға бағытталған Жас жол инспекторларының халықаралық жиынын атаймыз. Оған Қазақстанның барлық өңірінен іріктелген жеңімпаз 20 команда, сондай-ақ ТМД елдерінен (Ресей, Беларусь, Қырғызстан, Тәжікстан, Өзбекстан және Әзербайжан) келетін алты команда қатысады», – деді Мәжит Шүленов.
Қостанайдың негізгі фишкасына айналған «Алтын микрофон» халықаралық байқауы биыл 22 рет өнерпаздарды жинайды. Салмақты жобада шетелдер мен еліміздің әр өңірінен мықты деген 68 орындаушы бақ сынайды. «Супер марафон» қатысушылары бесінші рет бас қоспақ.
Дәстүрге айналған экскурсия автобусы сағат 15:00-ден кешкі 21:00-ге дейін қала ішін аралап, тәжірибелі музей қызметкерлері көшелер тарихынан, ежелгі сәулет туындылары мен заманауи нысандар жайлы сырт шертпек.
«Мирас» мәдениет үйінің шығармашылық ұжымы Әуежай, КСК, Қостанай-2 шағын аудандар мен Дружба, Қонай тұрғын алабтарына барып, концерттік қойылымдарын ұсынады. Бұл күні кешкі концерт қаланың екі жеріне: «Ұлы дала» саябағы мен орталық алаңға жоспарланған. Сағат 18:00-ден бастап «Караван» вокалды-аспаптық ансамблі, 19:00-ден бастап «Jasstar.kst» қалалық байқауының жүлдегерлері «Ұлы дала» саябағын ән мен күйге бөлейді. 20:00-де қарағандылық «Ветер перемен» тобының өнерін тамашалай аласыздар. Ал орталық алаңдағы концерт сағат 17:00-де «Сағындым, Қостанай» фестивалімен басталады. Әрі қарай жергілікті орындаушы Арыстан Құрмановтың шығармашылығына кезек беріліп, қалалық эстрада-джаз оркестрі түнгі Қостанайды әуенмен әлдилейді. Осылайша, мерекелік бағдарламаның алғашқы күні мәдени, тарихи, шығармашылық іс-шаралармен кестеленеді.
15-тамыз сенбі күні интерактивті алаңдар, шеберлік сағаттары, балалар флеш-мобы, әртүрлі спорттық сайыстар қарастырылған. Соның ішінде ұлттық қазақ күресінен мықтылар сынға түседі. Негізгі мерекелік концерт дәл осы күні кешке жоспарланып отыр. Оған қазақстандық танымал эстрада жұлдызы Батырхан Мәліков шақырылыпты. Тыңдармандар арасында Alem атымен белгілі өнерпаз туған өлкесіне қонаққа келіп, түнгі сағат 21:00-де сахнаға шығады. Ал 23:00-де отшашу.
Мерекенің үшінші күні 16-тамыз спорт және салауатты өмір салтына бағытталады.
— «Қала күнінде халықаралық деңгейдегі іс-шаралар өтеді. Сондықтан жоспар алдын ала пысықталып, бәрі бақылауда болуы тиіс. Түнгі отшашу кезінде азаматтардың қауіпсіздігі жіті назарға алынсын. Мереке күндері қоғамдық тәртіп пен жол қозғалысының қауіпсіздігін қадағалау қалалық полиция қызметіне жүктеледі. Тұрғын үй-коммуналдық шаруашылық бөлімі түнгі мезгілде автобустардың жүру уақыты мен бағытын осы бастан анықтау қажет», – деген қала әкімі Марат Жүндібаев тиісті бөлімдерге арнайы тапсырмалар жүктеді.
Үш күнге шақталған мерекелік іс-шаралар негізгі үш алаңда өрбитінін тағы бір мәрте еске саламыз. Олар – облыс әкімдігі алдындағы алаңда, «Ұлы дала» саябағында және сити-орталықта. Сондай-ақ қаланың барлық шағын аудандары мен әр бөлігінде түрлі бағдарламалар қарастырылған.
Қымбат ДОСЖАНОВА
Суретті түсірген – Василий ВАСИЛЬЕВ
