#REPOST @qostanai_tany - 5 шілде күні «Ұлы дала» жағалауының сахнасында Ұлттық домбыра күніне арналған «Домбыра – жанымыздың үні» атты мерекелік концерттік бағдарлама өтті
Мерекелік іс-шара қала тұрғындары мен қонақтарының басын қосып, қазақ халқының бай мәдени мұрасын қадірлейтін өнерсүйер қауымға көтеріңкі көңіл күй сыйлады. Кеш барысында ұлттық музыка өнерінің жауһарлары саналатын күйлер орындалып, көрермендер халық әндері мен күйлерін, әсерлі вокалдық шығармаларды және көркем хореографиялық қойылымдарды тамашалады.
Концерттің көркіне айналған сәттердің бірі – «Жастар биі», «Тепең көк», «Келіншек», «Сал күрең», «Балбырауын», «Еркесылқым» және күй өнерінің інжу-маржаны саналатын «Адай» күйлерінің орындалуы болды. Әрбір шығарма көрермендердің ыстық ықыласына бөленіп, домбыраның қазақ халқының рухани болмысы мен ұлттық мәдениетінің ажырамас нышаны екендігін тағы бір мәрте айқын көрсетті.
Мерекелік концертке «Мирас» қазақ халық аспаптарының этнографиялық ансамблі, «Мирас» би ансамблі, Қостанай қаласы білім бөлімінің шығармашылық ұжымдары, Қалалық балалар шығармашылық мектебі, «Жұлдыз» домбыра студиясы, «Белая мама» балалар шығармашылық студиясы, «Детская парковка», I-Qostanay, №1 балалар музыка мектебі, «Надежда» және «Эстель» би ансамбльдері қатысты.
Сонымен қатар Талғат Молдағалиев, Анастасия Пикулева, Анвар Оспанов, Зарина Жиентаева, Ерболат Жазықпаев, Даулет Ақтанов және Руслана Пономарева өнер көрсетіп, көрермендерге ұлттық және заманауи өнерді үйлестірген мазмұнды концерттік бағдарлама ұсынды.
Концерттік бағдарламаны Даулет Ақтанов пен Ажар Ермағанбетова жүргізіп, мерекелік кештің ерекше атмосферасын қалыптастырды.
Ұлттық домбыра күні – халқымыздың төл өнерін дәріптеп, ұлттық құндылықтарды насихаттауға, тарихи-мәдени мұраны сақтауға және оны жас ұрпаққа жеткізуге бағытталған маңызды мереке. Осындай мәдени іс-шаралар халық өнерін кеңінен насихаттап, ұлттық рухты нығайтуға және жас ұрпақтың дәстүрге деген құрметін арттыруға зор үлес қосады.
«Домбыра – жанымыздың үні» атты мерекелік концерт Қостанай қаласының мәдени өміріндегі жарқын оқиғалардың біріне айналып, қала тұрғындары мен қонақтарына ерекше әсер сыйлады.
Фото: @iannisivanmarmalidi
