Жеңіс күні қарсаңында «AMANAT» партиясының мүшелері соғыс ардагерлеріне құрмет көрсетіп, тағзым ету іс-шарасын өткізді.
«Ардагерлерді ардақтайық» партиялық жобасы шеңберіндегі іс-шараға партияның Қостанай облыстық филиалының төрағасы Алмат Досмұхамедов пен облыстық мәслихат депутаты Қырмызы Жаңбыршина қатысты. Партия өкілдері майдангер, Қостанай қаласының Құрметті азаматы Михаил Иванович Подоляковқа арнайы барып, оны келе жатқан мерекемен шын жүректен құттықтап, жылы лебіздерін білдірді.
Кездесу барысында Михаил Иванович сұрапыл соғыс жылдарындағы естеліктерімен бөлісті. 1925 жылы Половниковка ауылында дүниеге келген ол, 1942 жылы жасы толмағанына қарамастан, досымен бірге майданға аттанған эшелонға жасырын мініп кеткенін тебірене еске алды. Кейіннен танк училищесін тәмамдап, Солтүстік-Батыс, Воронеж, Степной, Орталық және 2-ші Украин фронттарындағы шайқастарға қатысқан ардагер соғыс даласында үш мәрте ажал аузынан қалған сәттерін айтып берді. Михаил Иванович тек майданда ғана емес, бейбіт өмірде де ел игілігі үшін тер төгіп, 50 жылдан астам уақыт статистика саласында еңбек етті, оның ішінде 30 жыл бойы облыстық басқарманы басқарды.
«Біз үшін Михаил Иванович сияқты аңыз адамдармен жүздесу – үлкен мәртебе әрі жауапкершілік. Оның тағдыры – нағыз ерлік пен Отанға деген шексіз сүйіспеншіліктің символы. Бозбала шағында өз еркімен майданға аттанып, танк тізгінінде сұрапыл шайқастарды бастан өткеруі, кейін бейбіт уақытта жарты ғасыр бойы ел дамуына үлес қосуы – кейінгі ұрпақ үшін таптырмас өнеге мектебі. «AMANAT» партиясы ардагерлеріміздің аманатын арқалап, олар орнатқан бейбітшілік құндылықтарын дәріптеуді өзінің басты парызы санауды жалғастыра береді. Біздің басты мақсатымыз – осындай қаһарман тұлғалардың есімін ұлықтап, оларға лайықты құрмет көрсету», – деді Алмат Досмұхамедов.
Партия мүшелері ардагердің өнегелі өмір жолы мен жауынгерлік ерлігі бүгінгі жастар үшін нағыз отансүйгіштіктің үлгісі екенін атап өтті. Бұл кездесу тек құрмет көрсету ғана емес, ұрпақтар сабақтастығы мен рухани байланыстың жарқын көрінісіне айналды. Айта кетейік, аталған игі шараға партия активі, Ардагерлер кеңесінің мүшелері, 6697 әскери бөлімінің сарбаздары мен «Жастар Рухы» жастар қанатының белсенділері де атсалысып, қарияға ерекше құрмет көрсетті. Ардагерлердің қаһармандығы мен маңдай терімен келген Жеңіс бүгінгі бейбіт өміріміздің берік негізі екені тағы бір мәрте айқын аңғарылды. Кездесу соңында қария ақ батасын беріп, ел іргесінің бүтіндігі мен бейбітшілікті тіледі.
Ақерке АРЫСТАНБАЙ
Суреттерді ұсынған – «AMANAT» партиясының баспасөз қызметі
