#REPOST @amanat_kostanay_oblysy Қостанай қаласында «Мирас» мәдениет үйінде қаржы алаяқтарынан қорғану тақырыбына арналған дәрістік семинар өтті
Шараға Экономикалық тергеу департаментінің қызметкерлері, облыстық полиция департаментінің киберқылмысқа қарсы бөлімшесі, Қаржы нарығын реттеу және дамыту агенттігінің мамандары мен «AMANAT» партиясының өкілдері қатысты. Кездесуге келген қостанайлық зейнеткерлер мен қарияларды ортақ мәселе – жинаған қаржысын алаяқтардан қалай қорғауға болатыны толғандырды.
Мамандар бүгінгі таңда кең таралған алаяқтық түрлерін түсіндіріп, қылмыскерлердің әрекет ету әдістерін әшкереледі және қарапайым сақтық шараларын үйретті. Әсіресе цифрлық гигиенаға баса назар аударылды: жеке мәліметтерді қорғау, банк карталарын қауіпсіз пайдалану, интернет-банкинг пен мобильді қосымшалардағы сақтық ережелері түсіндірілді. Киберполиция өкілдері нақты мысалдар келтіріп, алаяқтар қақпанына түскен жағдайда не істеу керегін айтты.
Семинарда Қостанай облыстық филиалы атынан филиал төрағасының міндетін атқарушы Жанар Куйшинова сөз сөйлеп, партия жүзеге асырып жатқан «Қарызсыз қоғам» жобасы туралы баяндады. Ол жоба қазақстандықтардың қаржылық сауаттылығын арттырып, борыштық жүктемесін азайтуға бағытталғанын атап өтті. Өткен жылы Қостанай облысында 10-мыңнан астам тұрғын арнайы курстардан өтіп, жеке қаржыны басқарудың негізгі дағдыларын меңгерді. Бағдарлама тек ересектерді ғана емес, жастарды да қамтиды: студенттер, мектеп мұғалімдері, колледж және ЖОО оқытушылары да оқудан өтті. Ауылдық жерлерде де тегін курстар ұйымдастырылып, тұрғындарға қаржыны дұрыс жоспарлау мен қарызға тәуелді болмаудың жолдары үйретілуде.
Жанар Куйшинова өз сөзінде жобаның басты мақсаты – әр азамат өз бюджетін сауатты жоспарлап, артық несие алмай, қаржылық қауіптен қорғана білетін қоғам қалыптастыру екенін атап өтті. Оның айтуынша, бұл бағыттағы жұмыс әсіресе үлкен жастағы адамдар үшін аса маңызды, себебі дәл осы топ жиі алаяқтардың нысанасына айналады.
