АЛҒАШҚЫ КЕЗЕҢ АЯҚТАЛДЫ...

«Арқада Наушабайдың Нұржаны өткен...» І республикалық дәстүрлі ән байқауының бірінші кезеңі мәресіне жетті.

<<<< қосымша фотосуреттерді жүктеу >>>>

Әр түкпірден келген 15 өнерпаз Наушабайұлының туындысын және халық композиторларының әндерін нақышына келтіре құйқылжытты.

Ертең екінші кезең.

Белгіленген талап бойынша, әр қатысушы қос туындыдан орындады.

Әуелгісінде Нұржан Наушабайұлының әндерін әуелетсе, екінші туындыны таңдау еркі қатысушыларға берілген. Қош, шарт-шартымен, қатысушылардың дайындығы бір бөлек әңгіме.

Тобыл-Торғай топырағында тұңғыш рет дәргей-дәрежесі бөлек дәстүрлі әннің жұпары аңқыған игілікті шараның әлқиссасында өңіріміздің Мәдениет басқармасының басшысы Ерлан Болатұлы сөз алды:

Нұржан Наушабайұлының өмір жолы, шығармашылығы халық көкейінде болғанымен, солақай саясаттың ықпалымен сол бір жылдары тасада қалып жатты. Ел егемендігін алған уақыттан бері өңірімізде Наушабайұлының әдеби мұрасын жаңғыртуға бірқатар шаралар қабылданған еді. Мәселен, Қостанай ауданы орталығындағы мектепке, ел ағаларының атсалысуымен, Нұржанның есімі берілді. Ал бүгінгі шара сол игілікті бастамалардың дара жалғасы деп білемін.

Байқаудың бірінші кезеңінде қатысушылар тақтақ ақынның «Көңілашар», «Бәтимаға», «Көкенай», «Асылым», «Ара-ай», «Жан сәулем» секілді дара дүниелерін шама-шарықтарына қарай орындады.

Сондай-ақ, Естайдың, Әсеттің, Мәдидің, Ахаңның құнды мұралары да шырқалды.

Қазылар алқасының шешімімен, 17 қазандағы екінші кезеңге барлық қатысушы лайықты деп танылды. Дәстүрлі әнге шөлеркеп жүрген баршаңызды «Алтын дән» МҮ, сағат 11.00-де күтеміз.

Нұрқанат Нүсіпхан