ІІІ РЕСПУБЛИКАЛЫҚ «ЖІБЕК ЖОЛЫ» ЭСТРАДАЛЫҚ ӘНШІЛЕР БАЙҚАУЫ ӨЗ МӘРЕСІНЕ ЖЕТТІ

Елбасымыз Н.Ә.Назарбаевтың «Болашаққа бағдар: рухани жаңғыру» бағдарламасының жалғасы "Ұлы даланың жеті қыры" мақаласын жүзеге асыру және 2019 жыл "Жастар жылы" деп жариялануына орай, еліміздің болашақ ұрпағына рухани патриоттық тәрбие беріп, отансүйгіштікке баулу мақсатында және Ғ.Жұбанова атындағы Ақтөбе облыстық филармониясының 75 жылдығы , Ақтөбе қаласының 150 жылдығына орай ұйымдастырылған ІІІ Республикалық «Жібек жолы» эстрадалық әншілер байқауы өз мәресіне жетті.

Байқауға Атырау, Қостанай, Қарағанды, Ақтөбе облыстары және Семей, Нұр-Сұлтан қалаларынан 20 үміткер қатысты. 23 тамыз күні сағ. 16:00 – де өткен баспасөз конференциясында жеребе тасталып, әр қатысушы өзінің реттік нөмірлерін алды. 24 тамыз сағ. 10.00-де байқаудың ашылу салтанаты өткізілді.

Байқаудың ережесі бойынша қатысушылар екі кезеңде ән шырқап, өз өнерлерін ортаға салды.

І кезең: Ақтөбе өңірінің ақын-жырауларының бір шығармасы. ІІ кезең: Қатысушының қалауы бойынша еркін тақырып. Байқауда "Құрмет" орденінің иегері, композитор, ҚР еңбегі сіңген қайраткері Бейбіт Оралұлы, әнші Гаухар Қаспақова, ҚР еңбегі сіңген қайраткері Марат Әйтімов, ақын Б. Өтеулинов және мәдениет саласының үздігі Б.Зейнелов төрелік етті. 20 үміткер бақ сынаған байқауда жерлесіміз, Рудный қаласының әншісі Назарханов Мерімхан 1 орынға ие болды. Амангелді ауданының әншісі Есетова Ғанибет және Алтынсарин ауданының әншісі Жанбырбаева Гүлбахыт дипломмен және арнайы сыйлықпен марапатталды.

Республикалық додада бақ сынаған өнерпаздарымызды шын жүректен құттықтай отыра, өнердің биік белестеріне жете беріңіздер демекпіз!

Сонымен қатар, Есетова Ғанибетті Алматы қаласындағы Әл-Фараби атындағы Қазақ ұлттық университетіне және Назарханов Мерімханды Т. Жүргенов атындағы академиясының студенті атануларымен құттықтаймыз!!!

Еліміздің абыройлы, білімді азаматы болыңыздар! Ақ жол!!!