19 қазанда Науырзым ауданының Шолақсай ауылдық мәдениет үйінде Республика күні қарсаңында облыстық «Тобыл сазы» вокалдық байқауы өтті
Бұл жолы байқаудың ауылдық жерде ұйымдастырылуы ерекше әсер қалдырды. Шолақсайлық ағайын өнерпаздарға зор қолдау көрсетіп, ауыл аймақ нағыз мерекелік көңіл-күйге бөленді. Мәдени іс-шараны облыстық мәдениет басқармасының қолдап, облыстық халық шығармашылығы және кинобейнеқор орталығы мен Қостанай облыстық композиторлар одағы ұйымдастырды.
Бұл өнер додасы өңірдің музыкалық мұрасын насихаттау, жергілікті композиторлардың шығармаларын кеңінен таныту және жас орындаушылардың шеберлігін шыңдау мақсатында өткізілді.
Жобаға ерекше қолдау білдірген Науырзым ауданының әкімі Мәди Ихтиляпов мұндай мәдени бастамалардың маңыздылығын, жастардың шығармашылығын дамытуға, жергілікті таланттарды қолдауға және Қостанай өңірінің бай музыкалық мұрасын сақтауға үлкен мүмкіндік беретінін атап өтті.
Байқауға Алтынсарин, Федоров, Амангелді, Меңдіқара, Қамысты, Қарасу, Сарыкөл, Ұзынкөл және Науырзым аудандарынан келген 15 әнші қатысты.
Әр қатысушы екі ән орындады: бірі – Қостанайлық композиторлардың шығармасы, екіншісі – қазақстандық авторлардың патриоттық туындысы.
Қазылар алқасының құрамында белгілі мәдениет және өнер қайраткерлері болды:
• Алдаберген Жақсыбаев – қазылар алқасының төрағасы, Қазақстан Республикасының мәдениет саласының үздігі, «DAUYS» вокалдық ансамблінің көркемдік жетекшісі, халықаралық «Азия дауысы» және «Discovery» байқауларының лауреаты (Ақтөбе қаласы);
• Азамат Мұқатов – әнші, композитор, «Үздік мәдениет қызметкері» төсбелгісінің иегері, Қостанай облыстық композиторлар одағының мүшесі;
• Қадыр Қаржауов – Қазақстан Республикасының мәдениет саласының үздігі, Е.Өмірзақов атындағы филармонияның солисі.
Сондай-ақ байқау қатысушыларына ізгі лебізін Қостанай облысының Құрметті азаматы, «Құрмет», «Парасат» және «Достық» ордендерінің иегері Өмірзақ Ихтиляпов ерекше ілтипат білдіріп, батасын беріп, облыстық халық шығармашылығы орталығының басшысы Дәмер Қалқаев құттықтады.
Қазылар шешімімен жеңімпаздар төмендегідей анықталды:
I орын – Фариза Жоламанова (Федоров ауданы)
II орын – Бейбарыс Тойшан (Қамысты ауданы)
III орын – Динара Мырзахметова (Федоров ауданы) және Юлия Галич (Қостанай ауданы)
Арнайы жүлделерге Қызғалдақ Дүйсенова (Науырзым ауданы) мен Әйгерім Мұхамбетжан (Амангелді ауданы) ие болды.
Барлық қатысушылар белсенділігі мен жоғары орындаушылық шеберлігі үшін ақшалай ынталандырулармен марапатталды.
«Тобыл сазы» байқауы облыстың мәдени өміріндегі жарқын оқиға болды. Бұл өнер мерекесі жас таланттарды қанаттандырып қана қоймай, Қостанай композиторларының туындылары арқылы туған өлкенің рухани байлығын паш етті.
