Бүгін Жастар сарайында 21 жылдық тарихы бар XXI халықаралық «Алтын микрофон-2025» әншілер байқауының салтанатты ашылуы өтті
Биылғы байқау қатысушылар саны жағынан рекорд орнатты – еліміздің барлық өңірлерінен және алыс-жақын шетелден келген 84 әнші бақ сынауда. Ерекше атап өтерлігі байқауға алғаш рет Ұлыбритания өкілі қатысып отыр. Бұл жоба ауқымының жыл сайын кеңейіп келе жатқанын көрсетеді.
Сахна шымылдығы жүргізушілердің қатысуымен өткен прологпен ашылып, олар халықаралық қазылар алқасының құрамын таныстырды. Қазылар қатарында Армения, Болгария, Қырғызстан, Беларусь, Украина және Қазақстанның мәдениет және өнер қайраткерлері бар. Қазылар алқасының төрағасы – Қазақстанның еңбек сіңірген қайраткері, композитор, әнші Жеңіс Сейдоллаұлы.
Салтанатты шарада Қостанай облыстық мәдениет басқармасының басшысы Құралбек Атамұратов құттықтау сөз сөйлеп, қатысушыларға сәттілік пен шабыт тіледі.
«Байқауға дайындық жылдың басынан басталды. Байқаудың келешегі зор. Біз бұл жұмысты әрі қарай ұлғайта береміз. Себебі бұл байқаудан қаншама таланттар шықты. Бүгін де жаңа есімдер танылады деп сенемін», – деді Құралбек Атамұратов.
Байқау төрт санат бойынша өтуде:• Кіші топ (7–10 жас)• Орта топ (11–13 жас)• Жоғары топ (14–17 жас)• Профи (тәжірибелі орындаушылар, түрлі байқаулардың жеңімпаздары)
Қатысушылардың өнері 10 балдық жүйемен бағаланады. Қазылар алқасы алғашқы күннен-ақ қатысушылардың жоғары дайындық деңгейін атап өтіп, «Алтын микрофон» байқауы кәсіби шеберліктің өсуін және халықаралық деңгейдегі вокалистер қатарын кеңейтіп отырғанын айтты.
Айта кетейік, бұл байқау Қостанай облысы мәдениет басқармасы мен Облыстық көркемөнерпаздардың халық шығармашылығы және кинобейнеқор орталығының қолдауымен ұйымдастырылуда.
