Бүгін Рудный қаласында Республика күніне арналған "Тобыл сазы" облыстық вокалдық байқауы өтті
Шығармашылық сайыстың басты ерекшелігі ән әлемінде есімдері алтын әріппен жазылған жергілікті композиторлардың шығармаларын орындау.
Байқау шарттары бойынша әр қатысушы отандық композитордың бір патриоттық әнін орындауы керек еді. Байқауға облыстың әр аудандары мен қалаларынан 14 талантты әнші қатысты.
Ұйымдастырушылар облыстық мәдениет басқармасы, облыстық көркемөнерпаздар халық шығармашылығы және кинобейнеқор орталығы, сондай- ақ Композиторлар одағының облыстық филиалы. Байқаудың басты мақсаты — Бақытжан Байқадамов, Болат Хамзин, Әбілақат Еспаев, Бақытжан Сәуекенов, Қалибек Дерипсалдин Алтынбай Сейтқасымов сынды сазгерлердің мұрасын дәріптеу.
Қазылар алқасының құрамында: Азамат Мұқатов — облыстық композиторлар одағының төрағасы, Алуа Мұсапірова — Рудный музыкалық колледжінің оқытушысы және қазылар алқасының төрағасы — Әсел Тасмағанбет, облыстық көркемөнерпаздар халық шығармашылығы және кинобейнеқор орталығының бөлім басшысы.
Музыка мерекесіне Троицк қаласынан келген қонағымыз, "Ақ Жайық" қазақ қоғамдық бірлестігінің және «Түркі» орталығының жетекшісі Гүлнәр Нәжімова да келді.
Ол көршілес екі ел арасындағы тәжірибе алмасу және достықты нығайту мақсатында арнайы келген.
Мерекелік кеш Әнұранмен басталып, көршілес Ресейден келген байқаудың тағы бір қонағы, Қазан қаласының өнер институтының студенті Карина Нажимованың өнерімен шымылдығын түрді. Ол жергілікті композитор Қалибек Деріпсалдиннің "Айлы түнде" әнін орындады.
Қазылар алқасы ән бәйгесінің жүзден жүйрігін анықтап:
Бірінші орын — Тасқын Әжібай, Федоров ауданы;
Екінші орын — Серікболсын Абықан, Алтынсарин ауданы;
Үшінші орын — Нұриден Қабыкен, Тобыл қаласы және Асхат Шыңғысов, Әулиекөл ауданы
Арнайы жүлде иегері — Әбдуахитова Фариза, Рудный қаласы.
Барлық жеңімпаздар мен қатысушылар арнайы дипломмен, ақшалай сыйлықтармен марапатталды.
