Жыр-терме өнері, өңірімізде соңғы жылдары қарқынды дамып келеді. Облысымыздағы терме орындаушылардың саны мен сапасы артып келе жатқандығы қуантады. Бұлай болуының басты себебі - дүйім жұртқа таныс жыр өнерінің майталмандары облысымызға арнайы келіп шеберлік сағатының өткізілуі. Бұл жоба қолға алынғаннан-ақ 4-жыл қатарынан конкурс алдын шеберлік сағаттары үзбей өткізіліп келеді. Күні кеше Жетісу өңірінің тумасы, ҚР Мәдениет қайраткері, дәстүрлі әнші Ерболат Шалдыбеков өзінің бар білгенін ортаға салып, жыр, дәстүрлі ән орындау мәнерін айтып өтті. 1-сағат, 40 минут уақытында Тобыл-Торғай мақамдарының өзге мақамдардан ерекше екендігін, дамыту үшін қандай жұмыс атқару керектігін айтты. 

 

"Дәстүрлі ән мен жыр-терме Қазақ өнерінің биік шыңы. Дауысы ашық, демі жеткілікті өнерпазды ғана осы өнердің иесі деп айта аламыз. Бұл өнер үлкен еңбекті талап етеді. Күніне 3-4 сағаттап дайындық жасалуы керек. Шығарманы жаттағаннан бөлек, айтылуы мен домбыраның тарту мәнеріне асқан ұқыптылық керек“ - деп Ерболат ағамыз өзінің бар білгенін ортаға салып, лекция тұрғысы мен практикалық тұрғыдан да өзінің білгенімен бөлісті.

 

Осындай шеберлік сағаттарға қатысуға ықпалын тигізген Дамер Елтайұлы ағаға және оның командасына мың алғыс айтамын. Алдағы уақытта осындай іс-шаралар көбінен ұйымдастырылса екен деймін.

 

Пікір иесі Алтынсарин аудандық мәдениет үйінің өнерпазы, ақын, дәстүрлі әнші Серікболсын Абықан @serikbolsyn_abikenov 

 

#ГидПоКазахстану