Қостанайда ҚР Еңбек сіңірген мәдениет қызметкері, Қазақстан композиторлар Одағының мүшесі, әнші-композитор Қалибек Деріпсалдиннің 70 жылдық мерейтойына арналған республикалық «Көктем-қыздар» атты әншілер байқауының бірінші кезеңі өтті.
Ән байқауына Қостанай облысымен қатар, Жетісу, Жамбыл, Ақтау, Ақтөбе, Ақмола өңірлерінен 12 үміткер қатысуда.
Байқаудың мақсаты - қазақтың ән өнерін насихаттау. Ән әлеміндегі жаңа есімдерді халыққа таныстыру.
Қалибек Деріпсалдиннің есімі республика жұртшылығына әуезді әндерімен танымал. Сазгердің бүгінде жүзге жуық туындысы ән әлемінде өз тыңдаушысын тапқан, ел аузында. Көпке белгілі шығармалары отандық танымал эстрада жұлдыздарының репертуарында орындалып жүр.
Ән сүйер қауым Жастар сарайына жиналып, Қостанайды әсем әнге бөлеген әншілердің өнеріне тәнті болды.
Кешке композитор Қалибек Деріпсалдиннің өзі қатысып, қазылар алқасының құрамында болды.
Кеш иесін облыстық мәдениет басқармасының басшысы Е.Қалмақов, ҚР Композиторлар одағының төрағасы Серікжан Әбдінұров құттықтап, иығына шапан жапты. Туған жерінен Аманкелді ауданы әкімінің Алғыс хаты табысталып, ардагерлер кеңесінің мүшелері сөз сөйледі.
Байқаудың І кезеңінде қатысушылар қазақ халық аспаптар оркестрінің сүйемелдеуімен 2 ән орындады. 1 ән міндетті түрде Қалибек Деріпсалдиннің, екінші ән өз қалауы бойынша жергілікті композиторлардың шығармаларынан болды.
Ал ертең өтетін ІІ кезеңде эстрада жанрындағы Қалибек Деріпсалдиннің 1 әні орындалады.
Қазылар алқасының құрамы:
1. Қалибек Деріпсалдин - ҚазССР-нің Еңбек сіңірген мәдениет қызметкері, Қазақстан Композиторлар Одағаның мүшесі, әнші-композитор, Қостанай қаласының және Амангелді ауданының құрметті азаматы;
2. Ермұрат Үсенов – ҚР Еңбек сіңірген мәдениет қызметкері, Қазақстан Композиторлар Одағаның мүшесі, композитор;
3. Серікжан Әбдінұров - ҚР Мәдениет қайраткері, композитор, профессор;
4. Жанатбек Кадиров – Мәдениет саласының үздігі, әнші.
Ертең сағат 11:00-де Жастар сарайында іс-шараның ІІ кезеңінде байқау жеңімпаздары марапатталады.
Іс-шараны ұйымдастырушы:
- «Қостанай облысы әкімдігінің мәдениет басқармасы» ММ;
- «Облыстық көркемөнерпаздардың халық шығармашылығы мен кинобейнеқор орталығы» КМҚК.
