Үш күн бойы Қостанай өңірін дүбірге толтырған «Алтын микрофон – 2023» XХ Халықаралық әншілер байқауы да өз мәресіне жетті. Байқаудың шешуші кезеңінде еліміздің әр өңірінен және алыс-жақын шет елдерден келген жас әншілер өнер көрсетті.
Екі күн қатарынан қазылар алқасы кіші, ортаншы, ересектер және кәсіби санатының өнерін бағалап, саралады. Байқауға Қазақстаннан өзге Болгария, Армения, Қырғызстан, Украина және Өзбекстан елдерінен келген әншілер келіп қатысқан болатын. Барлығы да жақсы дайындалып, үміттерін үкілеп келген жүйріктер. Қазылар алқасына шын жүйрікті даралау оңай болмағаны белгілі. Десе де жүзден жүйрік шыққан шын талант бүгінгі «Алтын микрофонның» жұлдызы болды. Байқаудың жабылу салтанатында «Алтын микрофонның» әр жылдардағы Гран-при иегерлері келіп, тосын сый жасады. Олардың қатарында Серік Қадыржанов, Анна Уварова, Бекболат Жазықпаев болды. Бір кездері жеңімпаз атанған алтын дауысты жастар қазір өнер әлемін бағындырып жүр.
Сонымен жеңімпаздардың есімдерін атар болсақ:
Гран-при Жамбылбек Қымбат, Жамбыл обл, Жамбыл ауд. (700 мың теңге.)
Кіші топ:
1 орын - Улуханова Алсу, Алматы обл. Қонаев қ. (300 мың теңге.);
2 орын - Муратов Сулейман, Алматы қаласы. (200 мың теңге.);
3 орын - Таубалды Нұржайна, Қостанай обл, Арқалық қ. (100 мың теңге.).
Орта топ:
1 орын - Тілеуімбетова Жасмин, Астана қ. (300 мың теңге.);
2 орын - Арыстан Шерхан, Алматы облысы. (200мың теңге.);
3 орын - Әбитмұқан Ақниет, Маңғыстау обл. Ақтау қ. (100 мың теңге.).
Жоғарғы топ:
1 орын - Жанұзақова Наргиз, Ақтөбе қ. ( 500 мың теңге);
2 орын - Господинова Мартина, Болгария, Варна қ. (400 мың теңге.);
3 орын - Абдрахманова Жанерке Ақтөбе обл, Ақтөбе қ. (300 мың теңге.).
Кәсіпқойлар тобы бойынша:
1 орын - Қайыркенов Досжан Алматы қ. (500 мың теңге.);
2 орын - Алибекова Ақбөпе Астана қ. (400 мың теңге.)
3 орын - Деркембаев Нурдөөлөт Қыргызстан Республикасы, Бишкек қ. (300 мың теңге.).
Байқау вокалдық өнердің жас талантты орындаушыларын анықтап, қолдау білдіріп, сондай-ақ Қазақстан халқының рухани бірлігі идеясын, халықтар достығын, ұлтаралық және мәдениетаралық шығармашылық диалогты дамыту, шығармашылық байланысты нығайта түсуді мақсат еткен.
Қазылар алқасының төрағасы – Жеңіс Сейдоллаұлы, әнші-композитор, Қазақстанның еңбек сіңірген қайраткері. Қазылар алқасының мүшелері: Қарлығаш Әбдікәрімова (Алматы, Қазақстан), Николай Текелиев (Болгария), Вреж Киракосян (Армения), Глеб Лапицкий (Беларусь), Гүлнара Тойғанбаева (Қырғызстан), Татьяна Апанасенко (Украина), Гүлбану Абдуллина (Қостанай, Қазақстан).
