Бүгін Қостанай қаласы Жастар сарайында «Алтын микрофон – 2023» XХ Халықаралық әншілер байқауы бастау алды

Өнер бәйгесіне 7-ден 23 жасқа дейінгі төрт жас аралықтағы Қазақстаннан өзге Болгария, Армения, Қырғызстан, Украина және Өзбекстан елдерінен 77 жас талант қатысуға ниет білдірген.

Ашылу салтанатында қазылар алқасының төрағасы Жеңіс Сейдоллаұлы мен облыстық мәдениет басқармасының басшысы Ерлан Қалмақов жас таланттарға ақ жол тілеп, осы байқаудан түлеп ұшқан бүгінде елге танымал әншілердің есімдерін атады.

19 сәуірде байқаудың бірінші кезеңі өтсе, 20 сәуірде екінші кезеңі өтеді.

Ал 21 сәуір сағат 11:00-де «Жастар сарайында» жеңімпаздарды марапаттау рәсімі және Гала-концерті болады.

Қазылар алқасының төрағасы – Жеңіс Сейдоллаұлы, әнші-композитор, Қазақстанның еңбек сіңірген қайраткері. Қазылар алқасының мүшелері: Қарлығаш Әбдікәрімова (Алматы, Қазақстан), Николай Текелиев (Болгария), Вреж Киракосян (Армения), Глеб Лапицкий (Беларусь), Гүлнара Тойғанбаева (Қырғызстан), Татьяна Апанасенко (Украина), Гүлбану Абдуллина (Қостанай, Қазақстан).

Біз өнер кешінің жоғары деңгейде өтуіне атсалысқан "Кербез" жетігеншілер тобына, "Таған" театрына және Федоров ауданынан келген "Жаркөл" этно-фольклорлы ансамблі мен "Жұлдыз" бишілер ұжымына, Е.Өмірзақов атындағы облыстық филармониясының әкімшілігіне алғысымызды айтамыз.