Бүгін Қостанай ауданы «Алтын дән» мәдениет үйінде Нұржан Наушабайұлы атындағы «Арқада Наушабайдың Нұржаны өткен...» ІІІ республикалық жыр-терме, дәстүрлі ән орындаушылар байқауының бірінші кезеңі бастау алды.
Наушабайдың Нұржаны – тұтас ұлт болып мақтан етуге лайық тұлғалардың бірі, атақты ақын, әйгілі әнші, дәулескер күйші, таңды таңға жалғаған жыршы, айтыста алдына жан салмаған сүлей, жамбасы жерге тимеген балуан, жүйрік мініп, құс салған саятшы – бір сөзбен айтқанда, нағыз дарын иесі болған. «Ұйықтама, оян, Алашым!» деп ұлтына ұран тастаған шайырдың шоң шығармалары, сом туындылары, діни-ағартушылық бағыттағы өр рухты, терең мазмұнды өлең-жырлары, шын мәнінде, қазақ халқының сарқылмас қазынасы. Ендеше, тақтақ ақынның, атпал дарынның асыл мұрасын насихат етіп отыру – ұрпақтың айнымас борышы.
Бүгінгі жыр-терме думанының басты мақсаты да сол: Нұржан бабамыздың кемел мазмұнды әндерін, жырларын жаңғырту. Байқауға Павлодар, Астана, Ақтөбе, Алматы, Қызылорда облыстарынан үміткерлер қатысуда. Қостанай облысының намысын Байдос Қожасағиев пен Арғынбек Бейбітхан қорғамақ.
Осы 17 үміткердің өнерін саралап, әділ бағасын беретін, қазылар алқасының құрамында:
Астана қаласынан келіп отырған белгілі жыршы, жырау, домбырашы, фольклор зерттеушісі, профессор, Қазақстанның еңбек сіңірген қайраткері, Қазақстан білім беру ісінің Құрметті қызметкері – Алмасбек Алматов.
Қазақтың көрнекті ақыны, жазушы, драматург, көсемсөзші-журналист - Ақылбек Шаяхметов және Арқалық қаласы Дала өлкесі тарихы облыстық мұражайының қызметкері, айтысқер ақын -Батырлан Сағынтаев бар.
Байқауыды облыстық мәдениет басқармасының басшысы Ерлан Қалмақов құттықтау сөзімен алып, сәттілік тіледі.
Бүгін байқаудың алғашқы кезеңі аяқталды. Қазылар алқасының шешімімен ақтық кезеңге жолдама алған үміткерлер ертең сағат 11:00-де дәл осы сахнада сынға түспек. Келіңіздер, көріңіздер.
