Сонымен, үш күнге ұласқан ХІХ "Алтын микорфон-2022" халықаралық байқауы да аяқталды. Жас әншілер додасына Қазақстанның әр түкпірінен және Армения, Болгария, Қырғызстан секілді алыс-жақын шетелдерден 49 үміткер қатысты.
Өнерлі өрендерге өз ісінің хас шеберлері төрелік етті. Атап айтқанда, қазылар алқасына әнші, композитор, ҚР Еңбек сіңірген қайраткері Жеңіс Сейдоллаұлы төрағалық етті. Қазылар құрамында: ҚР Мәдениет қайраткері, "Құрмет" орденінің иегері, "Бозторғай"және "Шаттық" халықаралық байқауларының директоры, "Витебсктегі Славян базары" халықаралық байқауының Қазақстандағы өкілі Қарлығаш Әбдікәрімова; Эстетика докторы, "Речныйе ноты" және "Сарандев" халықаралық фестивальдерінің ресми өкілі, "Витебсктегі Славян базары" халықаралық байқауының Болгариядағы өкілі Николай Текелиев; Армения Республикасы Мәдениет министрлігі жанындағы Ереван мемлекеттік мәдениет және сапа колледжінің директоры, "Витебсктегі Славян базары" халықаралық байқауының Армениядағы өкілі Вреж Киракосян; "Витебск" мәдениет орталығының бас директоры, "Витебсктегі Славян базары" халықаралық фестивалінің директоры Глеб Лапицкий; Қырғызстан Республикасының Еңбек сіңірген әртісі, "KGтай" балалар жобасының авторы және продюсері, "Art Bulak" қоғамдық қорының директоры Гүлнара Тойғанбаева; "Европа Молодая" халықаралық фестиваль-байқауының директоры, Украинадағы «Музыкальное созвездие» фестивалінің арт-директоры Татьяна Апанасенко; Қазақстан Республикасының Еңбек сіңірген қайраткері, Е.Өмірзақов атындағы Қостанай облыстық филармониясының жетекші әншісі Гүлбану Абдулина болды.
Байқауды ұйымдастырушы әрі құрылтайшысы – Қостанай облысы әкімдігінің Мәдениет басқармасы. Басқарма басшысы Ерлан Қалмақовтың және осы іс-шараның басы-қасындағы барлық жауапты қызметкерлердің арқасында "Алтын микрофон-2022" байқауы өте жоғары деңгейде өтті деп айтуға болады.
Байқаудың екі күнге ұласқан қос айналымынан соң қазылар алқасы жүзден жүйріктерді анықтады.
Сонымен, кіші топта 3-орын Ильназ Сатымоваға бұйырды (Қазақстан, Қостанай облысы, Жітіқара ауданы). 2-орын – Сағындық Түгелдің еншісінде (Қазақстан Қостанай қ.). 1-орынды Тамерлан Абдола қанжығасына байлады (Қазақстан, Бұрындай кенті).
Орта топ қатысушылары ішінде 3-орынға Ясмина Аюпова ие болды (Қазақстан, Қостанай облысы, Жітіқара ауданы). 2-орынға Мөлдір Базарбай лайық деп танылды (Қазақстан, Орал қаласы). 1-орын Адель Күнәділоваға берілді (Қазақстан, Нұр-Сұлтан қ.).
Ересек жас тобының үміткерлері арасынан жүлделі 3-орынды Ерасыл Мұқанов иемденді (Қазақстан, Нұр-Сұлтан қаласы). 2-орын – Айдай Балбаеваның қанжығасында (Қырғызстан, Бішкек қаласы). 1-орын Алина Сағынбаеваға бұйырды (Қазастан Нұр-Сұлтан қ.).
Ал "Алтын микрофон-2022" халықаралық байқауының басты жүлдесі – Гран Приді Болгария елінен келген жас дарын Славея Иванова жеңіп алды.
Айта кетейік, марапаттау салтанатына Қостанай облысы әкімінің орынбасары Бақыт Есімова қатысып, аймақ басшысының және өз атынан құттықтау лебізін жеткізіп, бас жүлдегерге марапатын табыс етті.
Біз осынау беделді байқаудың барлық қатысушыларын шын жүректен құттықтаймыз! Сондай-ақ, үздіктердің анықтау үшін үш күн бойы еңбектенген бүкіл қазылар алқасына айтар алғысымыз шексіз!
Мінекей, дәстүрлі доданың тарихы тағы да жарқын жұлдыздармен толыға түсті. Енді "Алтын микрофон-2023" байқауынан жаңа есімдер, дүлдүл дарындар күтеміз!
