Қостанай облысында бұрын-соңды болмаған, жосығы бөлек жобаның тұсауы кесілді. Өңір өнерпаздарын өзара сайыстыруға негізделген "Сахналық жекпе-жек" атты байқаудың ережесі ерекше. Екі күнге ұласқан бұл сын Тобыл қаласындағы "Алтын дән" мәдениет үйінде өтті.
Байқау шарты бойынша, әншілер өздерінің қабілет-қарымын жан-жақты байқатуы тиіс. Яғни сазды шығарманы кез келген тұрпатта, әрқилы сүйемелмен мінсіз орындап беруі керек. Берілген сынақты оңай еңсеріп, оң жамбасына келтіре алған қатысушы жеңімпаз атанады.
Сонымен, бұл додаға өңірімізге танылып, көрермен көзайымына айналып жүрген сегіз жас әнші қатысты. Атап айтқанда, олар – Нұриден Қабыкен, Жалғас Бекзат (Қостанай ауданы), Достияр Қайдаров (Меңдіқара ауданы), Тасқын Әжібай (Федоров ауданы),Бейбарыс Тойшан (Қамысты ауданы), Серік Алпысов (Алтынсарин ауданы), Асхат Шыңғысов (Әулиекөл ауданы) және Қанат Ражанов (Қостанай қаласы).
Байқаудың тағы бір ерекшелігі, үміткерлерге Тобыл-Торғай композиторларының әндерін орындау міндеттелді. Алғашқы айналым екі бөлімнен тұрды: әуелі әншілер өздерінің репертуарындағы әнді айтып беруі керек. Содан кейін олар бір-бірінің әндерін басқаша бағытта орындап шығуы тиіс. Ал байқаудың екінші айналымда әр қатысушы қасына оннан аспайтын адам ертіп шығып, Наурыз тойы туралы көрініс қоюы қажет. Ең басты мақсат, әрине, қазылар алқасының да, көрермен қауымның да көңілін баурау.
Қазылар демекші, қатысушылардың өнерін танымал театр актері, ҚР Еңбек сіңірген қайраткері Қонысбе Бегайдаров, елордадан жобаға арнайы шақыртылған мейман, сазгер, әнші, «ММ» өнер орталығының шығармашылық жөніндегі директоры Азамат Әбдірахиев, Е.Өмірзақов атындағы облыстық филармония әншісі, облыстық Композиторлар одағының төрағасы Азамат Мұқатов бағалады.
Өнер тартысына тыңғылықты дайындалып келген әншілер көрерменге шат-шадыман көңіл-күй сыйлап, сахнаны думанға бөледі. Дегенмен, қара қылды қақ жарған төрешілер үміткерлер ішінен үздіктерін іріктеп алды.
Осылайша, байқаудың алғашқы күнінің нәтижесінде 4 әншіге шешуші үшінші кезеңге жолдама берілді. Олар –Тасқын Әжібай, Жалғас Бекзат, Бейбарыс Тойшан және Қанат Ражанов.
Келесі күні ақырғы айналым басталмас бұрын сағат 14:00-де елордалық сазгер Азамат Әбдірахиев байқауға қатысушы өнерпаздарға "Сахна алдында дайындық" тақырыбында шеберлік сабағын өткізді. Жас та болса тәжірибесі толыққан, біліктілігі молыққан кәсіби композитор, шебер әнші Азамат Есенғазыұлы ақыл-кеңесін ортаға салды.
Араға 2 сағат салып, айрықша байқаудың соңғы айналымы басталды. Жеңістен дәмелі финалистер көш басынан көріну үшін жан сала өнер көрсетті. Тапсырма – өз таңдаулары бойынша, дауыс көрсететін кең тынысты әндер орындау. "Шапқан сайын жаны кірген" жүйріктер сынды, алға озған сайын ширыға түскен өнерпаздар тартысты бәсекенің нағыз үлгісін танытты. Нәтижесінде, қазылар алқасының шешімімен, 4 қатысушы да жүлдесіз қалған жоқ.
3-орынды Қостанай ауданының намысын қорғаған Бекзат Жалғас пен қамыстылық Бейбарыс Тойшан бөлісті. 2-орын – қостанайлық дарын Қанат Ражановтың еншісінде. Ал 1-орынға Федоров ауданынан келген Тасқын Әжібай ие болды. Жүлдегерлер ақшалай сыйлық сертификатымен және дипломмен марапатталды.
Байқауға сахнасын ұсынып, жоғары деңгейде өтуіне қолдау көрсеткен "Алтын дән" мәдениет үйінің ұжымына зор алғысымызды білдіреміз!
