Қостанайда Ұлттық этникалық театрлардың республикалық V фестивалі өтті. Аталмыш фестиваль Қазақстан Республикасының Мәдениет және спорт министрлігі, Қазақстан халқы Ассамблеясы мен Қостанай облысы әкімдігінің қолдауымен өткізілді. Шара барысында Республикалық мемлекеттік академиялық корей музыкалық комедия театры, Қостанай облыстық орыс драма театры, Шымкент қалалық өзбек драма театры, І.Омаров атындағы Қостанай облыстық қазақ драма театры, Қ.Қожамияров атындағы Республикалық мемлекеттік академиялық ұйғыр музыкалық комедия театрлары Қостанай жұртшылығына өз өнерлерін паш етті.
Мемлекеттік академиялық Ұйғыр музыкалық театры – Қазақстанда ертеден етек жайған өнер ұжымдарының бірі. Театр өнердің «патшалығы» болған Алматы қаласында орналасқан. Ұлттық этникалық фестивальгдің 3-ші күнінде аталмыш театр әйгілі «Апат» музыкалық пластикалық спекталін көрермен назарына ұсынды.
Ұйғыр музыкалық драмалық театрының ұжымы сахнада көнеден мирас болып қалған дәстүрлі өнер мен салт-сана көріністерінің жарқын үлгілерін паш етті. Түрлі музыкалық жанрды өзіне жиған спектакль психикалық дертке шалдыққан науқастар мен дәрігер жайлы өрбіді. Үлкен дайындықпен, еңбекпен сахналанған туынды қостанайлық көрермендерге жылы әсер қалдырғандай. сезімін көңіл толқынымен, үнсіздігімен ұштастырған сәттері ұтымды болды.
Қазақстан Ұлттық (этникалық) театрларының 5-ші республикалық фестивалінің Тобыл төсінде өтуінің де өзіндік себебі бар екен. Ұйымдастыру алқасы Қостанай – әртүрлі этностар мекен ететін бай өңір деген байламға келіпті. Иә, театр — адамның рухани демалып, басқа бар әлемге шағын саяхат жасауына ықпал ететін мәдени орын екені сөзсіз.
