Меңдіқара ауданында өнер сүйер қауым үшін ерекше күн болды. Ауданда Сейіт Кенжеахметов атындағы «Мірдің оғы» республикалық әзіл-сықақ театрлар байқауы өз мәресіне жетіп, көптің көңілінен шыққан думанды шара өтті
Облысымызда бесінші рет ұйымдастырылған бұл байқауға еліміздің әр өңірінен 8 театр ұжымы қатысып, өнер бәсекесінде бақ сынады.
Өнер додасының әділ өтуіне қазылық еткен мәдениет саласының беделді өкілдері арнайы келді. Олардың қатарында Асылбек Боранбаев – Қазақстанның еңбек сіңірген қайраткері, Нұрлыбек Жұбатқан – жазушы-сатирик, ҚР мәдениет қайраткері және Бауыржан Орда – «Серпер» Жастар сыйлығының лауреаты бар.
Атақты сатирик Көпен Әмірбек арамызда болмаса да, оның жары Әйгерім ханым мен ұлы Жұбаныш арнайы қонақ ретінде қатысты.
Шараға белгілі ұстаз-ғалым, Ы.Алтынсарин медалінің иегері, «Жеті қазына» этнопедагогикалық бағдарламасының авторы Зәмзагүл Сейітқызы Кенжеахметова да келіп, әкесінің рухына тағзым етіп, қатысушыларға жылы лебізін білдірді.
Меңдіқара ауданының әкімдігі мен зиялы қауым өкілдері де қатысушыларға қолдау көрсетті.
Байқау екі кезеңнен тұрған еді.
Алдымен Сейіт Кенжеахметов шығармаларынан үзінді орындау және еркін тақырыптағы қойылым ұсыну.
Театр ұжымдары қазақ сатирасының табиғатын сақтай отырып, заманауи тақырыптарды да шебер қозғады. Көрермендер күлкіге қарық болып қана қоймай, ойға қалдырар дүние де көп болды.
Сонымен жеңімпаздар белгілі болып, марапаттарға ие болды.
Бас жүлде — Жангелдин ауданы
«Мірдің оғы» әзіл-сықақ театры
Жетекшісі — Шыңғыс Садуақасов.
1 000 000 теңге.
I орын — Жамбыл облысы, Талас ауданы, жетекшісі —
Мырзамбетова Жанар.
700 000 теңге.
II орын — Маңғыстау облысы, Жаңаөзен қаласы
«Бозжыра» әзіл-сықақ театры
Жетекшісі — Нұров Қайырбек.
600 000 теңге.
III орын — Арқалық қалалық
«АБАДАН» әзіл-сықақ театры
Жетекшісі — Бейсенбек Мейрамбек. 500 000 теңге.
Барлық қатысушыларға 200 мың ақшалай сертификаттар мен арнайы алғыс хаттар табысталды.
Байқау биыл да өз мақсатына жетті — Сейіт Кенжеахметовтің сатиралық мұрасын насихаттап, әзіл-сықақ жанрын дамытатын таланттарды танытып, өңірлер арасындағы шығармашылық байланысты күшейтті.
