Қостанайда қазақтың аса көрнекті ағартушысы, қоғам қайраткері, ақын, жазушы, жалынды көсемсөз шебері Міржақып Дулатұлының 140 жылдығына орай «Рухқа толы жалын жырлары» атты республикалық ақындар мүшәйрасы өтті
Шара ұлт әдебиеті мен тарихындағы Міржақып мұрасының маңызын айшықтап, жас буынның шығармашылық қарымын шыңдауды мақсат етті.
Мүшәйраға еліміздің әр аймағынан 12 ақын қатысып, өз туындылары арқылы ақынның қайсар рухы мен ұлтқа қызмет ету мұратын жырға қосты.
Қазылар алқасының төрағасы ақын, «Дарын» мемлекеттік жастар сыйлығының лауреаты Қалқаман Сарин арнайы келді. Сонымен қатар ақын, жазушы, «Алаш» халықаралық әдеби сыйлығының лауреаты Ақылбек Шаяхмет, ақын, Қазақстан Жазушылар одағының мүшесі Батырлан Сағынтаев төрелік етті.
Мүшәйра қорытындысы бойынша төмендегідей ақындар марапатталды:
• Бас жүлде – Мұстафиев Бауыржан Ширмединұлы, Батыс Қазақстан облысы. (700 000 теңге).
• І орын – Сламғали Аманжол Рахымжанұлы, Ақтөбе қаласы. (500 000 теңге).
• ІІ орын – Кеңесов Баймұрат Азидоллаұлы, Атырау облысы. (400 000 теңге).
• ІІІ орын – Аяған Диас Саматұлы, Солтүстік Қазақстан облысы, Қызылжар қаласы және Әуезхан Ернұр Саянұлы, Қостанай облысы, Амангелді ауданы (300 000 теңге).
Сонымен қатар барлық қатысушыларға ынталандыру мақсатында ақшалай сыйлықтар табысталды. Мүшәйра Міржақып Дулатұлының рухани мұрасына тағзым етумен қатар, ел поэзиясына жаңа леп беретін жас таланттардың танылуына жол ашты.
