«ЖҰМЫС — БІЛЕКТЕ, ӨНЕР — ЖҮРЕКТЕ»: Қасым-Жомарт Тоқаев Қазақстан халқына арнаған жолдауында биылғы жылды «Жұмысшы мамандықтары жылы» деп жариялаған болатын. Осыған орай облыстық көркемөнерпаздардың халық шығармашылығы және кинобейнеқор орталығы мен «СарыарқаАвтоПром» ЖШС бірлесіп «Алло, біз таланттарды іздейміз» жобасын жүзеге асырып жатыр. Бұл еңбекқор, дарынды азаматтарының шығармашылық қабілеттерін ашуға бағытталған ерекше бастама.
Бүгін іріктеу кезеңі өтті. Байқау үш бағыт бойынша өтіп жатқанын естеріңізге сала кетейік: вокал, хореография және көркемсөз оқу. Қатысушылар өтінім берген реттік сандары бойынша ортаға шықты. Бұл кезеңде әр өнерпаз өз өнерін көрсетіп, талантын танытты.
Іріктеу кезеңіне барлығы 14 концерттік номер ұсынылды. Қатысушылардың бірі әсем ән шырқады, бірі жарқын би билеп, көркемсөз оқып, өнерін паш етті.
Талантты өнерпаздарды сараптау үшін мәдениет саласының үздігі Салтанат Жақаева, облыстық халық шығармашылығы орталығының бөлім басшысы Әсел Тасмағанбет пен орталықтың әдіскері Қуаныш Жәркенов өз бағаларын беріп, өнер көрсетушілердің әрқайсысының даралығын бағалады.
Іріктеу кезеңінің қорытындысы ертең жарияланады.
