«ЖҰМЫС — БІЛЕКТЕ, ӨНЕР — ЖҮРЕКТЕ»: Облыстық көркемөнерпаздардың халық шығармашылығы және кинобейнеқор орталығы мен «СарыарқаАвтоПром» ЖШС бірлесіп жүзеге асырып жатқан «Алло, біз таланттарды іздейміз» жобасы – еңбекқор, дарынды азаматтарының шығармашылық қабілеттерін ашуға бағытталған ерекше бастама
Бұл жоба еңбек адамдарының жасырын таланттарын танытуға мүмкіндік беріп қана қоймай, олардың өнерге деген сүйіспеншілігін дәріптеуді көздейді. Сонымен қатар, Қазақстан Республикасының Президенті Қасым-Жомарт Тоқаевтың Жолдауында 2025 жыл «Жұмысшы мамандықтары жылы» деп жарияланып, еңбекке құрмет көрсету мен шығармашылық әлеуетті дамытуға ерекше мән берілуде.
Жобаның №8 қатысушысы – Арман Закиров.
Арман – GEPICS жүйесінің әкімшісі. Ол техникалық салада қызмет етсе де, шығармашылыққа деген қызығушылығы ешқашан төмендеген емес. Мектепте оқып жүрген кезінен бастап өнерге жақын болып, түрлі мәдени іс-шараларға қатысып, өз талантымен көзге түскен. Арман «Жігіт сұлтаны» байқауына қатысып, өз өнерін бағалаған. Бұл байқауда ол тек сыртқы келбетімен ғана емес, музыкалық қабілеттерімен де дараланып, жүлделі орындарға ие болды.
Қазіргі таңда ол өнерді өзінің өміріне қосымша мақсат ретінде қарап, осы жобада да өз қабілетін көрсете отырып, қайтадан бақ сынауды шешті. Арманның арманы – шығармашылық жолында табысқа жету, әрі оны кәсіби деңгейде дамыту. Осы жоба арқылы ол өз таланты мен өнерін жаңа деңгейге көтеріп, көпшіліктің назарын аударуға тырысады.
