Арқалық қаласында бүгін ерекше кеш – сатирик-жазушы, этнограф-ғалым Сейіт Кенжеахметұлының 85 жылдығына арналған «Мірдің оғы» атты республикалық фестивалі өтті
Қазақтың қалжыңы мен әзіл-сықақ өнерін дәріптеген бұл фестиваль дәстүрлі түрде ұйымдастырылып келеді.
«Қыр елінің Крыловы» атанған Сейіт Кенжеахметұлының шығармашылығы мен қаламгерлік еңбегі қазақы әзілдің асыл мұрасы ретінде халық арасында кеңінен танымал. Фестиваль аясында еліміздің әр өңірінен келген әзіл-сықақ театрлары өз өнерлерін көрсетіп, қазақы әзілдің тереңдігі мен маңызын насихаттайды.
«Мірдің оғы» фестиваліне Қостанай, Жамбыл, Маңғыстау өңірлерінен келген 5 театр ұйымы қатысып, өнер көрсетіп, ақшалай марапатқа ие болды.
Бұл іс-шара қазақы әзіл-сықақ өнерінің биік шыңын көрсетіп, түрлі аймақтан жиналған өнерпаздардың шығармашылығын паш ететін алаңға айналып отыр.
Фестиваль жыл сайын Қостанай мен Тобыл-Торғай өңірінде ұйымдастырылып келеді. Осы фестивальдің тұрақты қонағы әрі қолдаушысы, Сейіт Кенжеахметұлының көзін көрген белгілі сатирик, қазақ сатирасының саңлағы Көпен Әмірбек болатын. Өкінішке қарай, Көпен ағамыз бүгінде арамызда жоқ. Дегенмен, оның отбасы бұл жолы арнайы қонақ ретінде фестивальге қатысып, жылы естеліктерімен бөлісіп, Сейіт ағамыздың шығармашылығына деген құрметті сақтады.
Кеш соңында Сейіт ағаның қызы Зәмзәгүл апай қатысушыларға сый-сияпат көрсетті. Облыстық мәдениет басқармасы мен облыстық халық шығармашылығы орталығы апайға құрметтеп, шапан жапты. Алғысын жеткізді.
Арқалық қаласының әкімдігі мен Мәдениет үйінің ұжымына қолдау көрсетіп, біріге жұмыс атқарғандары үшін айтар алғысымыз шексіз.
Фестиваль тек сахналық өнерді дәріптеу ғана емес, сонымен бірге қазақтың мәдени мұрасын, әзіл-қалжыңдағы даналықты ұрпаққа жеткізу жолындағы игі бастама бола бермек.
