Қала күніне тарту ретінде Сити-орталықта, Жағажайдағы концерт алаңында және Жастар сарайы алдында облыс өнерпаздарының концерті өз деңгейінде өтті.
Рудныйлық «Жизель», «Аққу» би ұжымдары, әнші Даяна Шагатаева, Фариза Абдуахитова, «Вива» дуэті, «Ұлы дала» триосы және өзге де өнерпаздар би мен әннен шашу шашты. Федоров аудандық «Жастар» мәдениет үйінің концерттік бағдарламасы да көпшіліктің көңілінен шықты. Әділхан Сұлтанов Н.Тілендиевтің «Аққу» күйін орындап, Арғынбек Бейбітхан мен «Жетігеншілер» триосы Ү.Ыбырай «Гәккуі» мен «Құстар әнін» әуелетті. Басқа концерттік номерлер де елдің көңілін көтерді. Қостанай аудандық «Алтын дән» мәдениет үйінің өнерпаздары да ерекше концерттік бағдарлама әзірлеп келген. Қазақ биі «Самғауды» «Надежда» халық би ансамблі ұсынып, «Туған жер» әнін «Шабыт» тобы, «Жаса қазағым» әнін Ажар Ермағанбетова, «Салем саған, туған ел» әнімен «Жайдарман» қазақ әндерінің халық ансамблі, «Попурриді» «Боярыня» фольклорлық ансамблі түрлендіріп шырқады. Үш өңірдің өнерпаздары да қала күніне орай өткен шығармашылық марафонға ерекше дайындықпен келген.
Жалпы үш жерде өткен концерттік бағдарлама қала күніне тамаша тарту болды.
Іс-шараны Қостанай облысының және қаласының әкімдігі, облыстық мәдениет басқармасы, облыстық халық шығармашылығы орталығы ұйымдастырып отыр.
