Екі күнге созылған сатирик-жазушы, этнограф-ғалым, қазақы қалжыңының хас шебері, «Қыр елінің Крыловы» атанған Сейіт Кенжеахметов атындағы «Мірдің оғы» республикалық әзіл-сықақ театрлары арасындағы байқау-фестиваль мәресіне жетті.
Кеше олар Сейіт Кенжеахметов ағамыздың шығармаларынан көрініс қойса, екінші күні өздері таңдаған туындыларды орындады. Сахнада сатириктің "Мың мұң", "Әр дәуірдің әңгімесі", "Чернышевский", "Айтылмайтын әңгіме", "Деген екен", "Той", "Айсамен әңгіме", "Кешірілмейтін күнә", "Әке тәрбиесі", "Шындық қалай шықты?" сияқты бірқатар әзіл-сықақтары көрініс тапты. Қазылар алқасы өнер сайысының ұйымдастыруына жоғары баға берді.
— Бүгінгі кеш өте жоғары деңгейде өтті. Байқауды ұйымдастырған облыс әкімдігінің мәдениет басқармасына әділқазылардың, қатысушылардың және ұрпақтары атынан шын ризашылығымызды білдіреміз. Бұл фестиваль жыл сайын өтуі тиіс деп есептеймін. Өйткені, Сейіт ағамыздың өзі кезінде қазақ сатирасының дамуына зор үлес қосқан кісі. Ол кісі Оспанхан Әубәкіров, Берқайыр Аманшин, Шота Смаханұлы, Үмбетбай Уайдин сияқты халқымыздың әзіл-сықақ сойылын соққан танымал тұлғаларымыздың бірегейі. "Тамаша" ойын-сауық отауында басшылық қызмет істеп жүргенде мен бұл кісімен көп араластым. Ағамыздың адамгершілігі, адами қасиеті, биік парасатын үлкеге құрмет, кішіге ізет көрсете білетін қасиетіне тәнті болғанмын. Сейіт аға "Тамашаның" тұрақты авторларының бірі еді. Талай шығармасын сахналадық. Оның өлмес мұрасын кейінгі буын өкілдері де кеңінен насихаттай береріне кәміл сенемін, - деді "ТТТ" театрының директоры Асылбек Боранбай.
Сонымен, екі күнге ұласқан "Мәрдің оғы" республикалық әзіл-сықақ театрлары байқауының бас жүлдесі Ақтөбе облысынан келген "Түйреуіш" әзіл-сықақ театрының әртістері еншілеп, 500 мың теңгені жеңіп алды. Бірінші орынды Түркістан облысының Келес ауданынан келген "Күлкі терапиясы" театры иеленді. Олар 300 мың теңгелік жүлдеге қол жеткізді. Жүлделі екінші орынды Маңғыстау облысы, Жаңаөзен қаласынан келген "Бозжыра" театрының ұжымы еншілеп, 250 мың теңге ұтты. Үшінші орын Атырау облысынан келген "Ара-Атырау" сатира театрына бұйырды. Оларға 200 мың теңге сыйлық табыс етілді. Оның сыртында Ғұмар Ахметчин атындағы арнайы сыйлық Жамбыл облысы, Талас ауданынан келген «Талас» халық театры алды. Қостанайлық кәсіпкер Қарлығаш Балапанова тіккен "Көрермендер көзайымы" жүлдесімен Алтынсарин ауданының өнерпазы Біржан Жүзбай марапатталды. Қалған қатысушыларға фестивальдің Алғыс хаттары мен ескерткіш сыйлықтар, 100 мың теңгеден жүлде үлестірілді. Фестивальден соң С.Кенжеахметов ағамыздың ұрпақтары, туыстары ас беріп, әруаққа құран бағыштатты.
Аталмыш шараны ұйымдастыруға көмекші болған Қостанай ауданы әкімшілігіне, мәдениет қызметкерлеріне айтар алысымыз зор. Сонымен қатар шара барысында қолдау көрсеткен Әулиекөл, Федоров, Қамысты аудандарының өнерпаздарына әсем әуендерімен көрермен көңілін көтергені үшін көп рахмет айтамыз.
