Орталық саябақта рудныйлық өнерпаздар өнер көрсетті. Ахмет Байтұрсынұлының 150 – жылдығына арналған «Dala Fest» шығармашылық марафоны аясындағы концерт осылай жалғасын тапты.
Әр жұманың мерекелі кешіне баршамыз әбден үйреніп алдық. Би де, ән де осы жерде. Баласын жетектеген ана да, кешкі серуенге шыққан көпшілік те концерт тамашалайды.
- Бүгінгі концерт тамаша болды. Өнерпаздардың киімдері де, әзірлеп келген номерлері де көңілімнен шықты. Ахаң есімі қалай ұлықталса да жарасымды. Осымен екінші жұма келіп тұрмын, — дейді немересін жетектеген Айгүл апа.
Расымен жаздың жайдарлы кеші тек осындай көңілді әрі думанды болуы керек.
Кеншілер қаласының мәдениет бөлімінің, Мәдениет үйінің басшылары мен қызметкерлеріне, барша өнерпаздарға алғысымыз шексіз.
Ахмет Байтұрсынұлының 150 жылдығына арналған «DALA FEST» шығармашылық марафоны осылайша әр жұмада жалғасын тауып келеді.
Естеріңізге сала кетсек, аталмыш марафонның негізгі мақсаты – Қостанай облысының шығармашылық ұжымдары мен әртістерінің халық шығармашылығын насихаттау және дамыту.
Іс-шараны ұйымдастырушылар: - «Қостанай облысының әкімдігі» ММ; - «Қостанай облысы әкімдігінің мәдениет басқармасы» ММ.
Іс-шараға қатысушылар: Қостанай облысының шығармашылық ұжымдары мен әртістері. Олар жаз бойы әр жұмада өнер көрсетіп келеді.
Суреттерді түсірген Б. Ахметбеков
