«DALA FEST» шығармашылық марафонын қабыл алған Жангелдин және Қарабалық ауданының өнерпаздары әдеттегідей Орталық саябақта өнер көрсетті. Әр жұмада концерт көруге келетін халық бұл жолы да баршылық.
Сонау Жанкелдин ауданынан келген әншілер небір әнді орындады.
«Бишілеріңіз қайда?» дейміз аудандық мәдениет үйінің директоры Гүлзат Хамзинаға.
— Несін жасырамыз, ауданда кадр жетіспеушілігі бар. Жас мамандар қажет-ақ. Бірақ бүгінгі концертке дайындықпен келдік. Жақсы бастама,— дейді ол.
Жаздың жайдарлы кештері қандай жағдайда да жанға жайлы әуенге толы. Бұл орайда осындай кешті ұйымдастырған білікті мамандар мен өнерпаздардың еңбегін ерекше бағалай кеткеніміз жөн болар. Бастысы халық риза. Айтпақшы ауданның өнерін жандандырып, үлес қосам деген жастар болса киелі Торғай жері күтеді.
Қос ауданның мәдениет бөлімінің, Мәдениет үйінің басшылары мен қызметкерлеріне, барша өнерпаздарға алғысымыз шексіз.
Енді шығармашылық марафонды Б.Майлин, Қарасу аудандарының өнерпаздары жалғастырмақ.
Ахмет Байтұрсынұлының 150 жылдығына арналған «DALA FEST» шығармашылық марафоны осылайша әр жұмада жалғасын тауып келеді.
Естеріңізге сала кетсек, аталмыш марафонның негізгі мақсаты – Қостанай облысының шығармашылық ұжымдары мен әртістерінің халық шығармашылығын насихаттау және дамыту.
Іс-шараны ұйымдастырушылар:
- «Қостанай облысының әкімдігі» ММ;
- «Қостанай облысы әкімдігінің мәдениет басқармасы» ММ.
Іс-шараға қатысушылар:
Қостанай облысының шығармашылық ұжымдары мен әртістері.
Олар шілде және тамыз айлары бойы әр жұмада өнер көрсете бермек.
