Қостанай облысы әкімдігінің мәдениет басқармасы Қазақ КСР Халық әртісі, көрнекті театр және кино актері Сералы Қожамқұловтың 125 жылдығына арналған "SERALY FilmFestival" қысқа метражды көркем фильмдердің республикалық фестиваль-байқауын қорытындылауда.
"SERALY FilmFestival" республикалық қысқаметражды көркем фильмдер фестиваль-байқауы — фестиваль қатысушыларына шығармашылық серпін сыйлап, Қазақстанның кино саласына өз есімдерін таныстыруға жол ашатын бірегей мәдени іс-шара екенін естеріңізге сала кетейік.
Фестивальге өндірістік киностудиялар, ұйымдар және Қазақстан Республикасының азаматтары қатысуға мүмкіндік алды. Республикалық "SERALY FilmFestival" қысқаметражды көркем фильмдер фестиваль-байқауына қатысуға Қазақстанның әр аймағынан барлығы 40 өтінім келіп түсті. Олардың үздік дегендерін қазылар алқасы саралап, өз бағасын берді. Бүгін Жастар сарайында кинофестиваль лауреаттарының фильмдерінің көрсетілім болды.
Қазылар алқасында төрағасы, С.Қожамқұлов атындағы Жезқазған қазақ музыкалық-драмалық театрының директоры, театр және кино актері – Сәкен Досхан Сәкенұлы, М.Әуезов атындағы Қазақ ұлттық драма театры музейінің жетекшісі, Мәдениет саласының үздігі - Наргиз Тамабекқызы, продюсер, 20-дан астам фильмнің режиссері- Мәдина Әлімхан бар. Қазылар 4 номинация бойынша жеңімпаздарды анықтады. Осы номинант фильмдерді көрермендер тамашалады.. «SERALY Film Festival» республикалық қысқаметражды көркем фильмдер байқауында «Үздік оператор», «Үздік режиссер», «Үздік сценарист» және «Үздік фильм» номинациялары бойынша бағаланды. Олардың есімдерін марапаттау сәтінде білетін боламыз.
Көрсетілімнен соң қазылар алқасы мен фестиваль қонақтары баспасөз мәслихатын өткізді. Жиналғандардың сұрақтарына жауап беріп, өз пікірлерін де ортаға салды. Номинанттардың ыстық лебізін естіп, алғысқа бөленді. 
