ҰЛТТЫҚ ӨНЕРДІ ҰЛЫҚТАП

Облыстық тарихи-өлкетану музейінде Құрманғазы Сағырбайұлының 205 жылдығы қарсаңында, Ұлттық домбыра күніне орай "Күмбірле, қоңыр домбыра!" облыстық домбырашылар байқауы өтті.

Байқау алдында Тобыл-Торғай өңіріне танымал тұлғалары ұстаған домбыралар көрмесі ұйымдастырылды. Олардың ішінде Амангелді Имановтың, Әсия Беркенова, Серәлі Қожамқұлов сынды тұлғаларымыздың домбыралары да бар.

Байқауға барлығы 15 күйші қатысып, бақ сынады. Қатысушылардың деңгейі өсіп, қатары да көбейген. Байқауда танымал күйлермен қоса Тобыл-Торғай өңірі композиторларының шығармалары да орындалды.

Өнерпаздарды байқаудың төрағасы, Облыстық көркемөнерпаздардың халық шығармашылығы мен кинобейнеқор орталығының ұлттық жанр әдіскері Мұрат Хамитов, «Ақжелең» фольклорлы-этнографиялық ансамблінің жетекшісі, Республикалық, халықаралық күйшілер, домбырашылар байқауының жүлдегері Ыбырай Есжанов және Назымбек Молдахметов атындағы қазақ ұлт аспаптар оркестірінің әртісі, солисті. Халықаралық, Республикалық, күйшілер, домбырашылар байқауының лауреаты Данияр Рысбек сынға алып, қазылық етті.

Байқау қорытындысы бойынша:

1 орын - Қайсар Ниязұлы, Сарыкөл ауданы;

2 орын - Марк Ли, Рудный қаласы;

3 орын - Дінмұхамед Санай, Қостанай ауданы;

Үздік шертпе күйді орындаушы номинациясы - Айбек Сыздықов, Алтынсарин ауданы.

Байқаудың өтуіне атсалысқан Облыстық тарихи-өлкетану музейіне, басшысы Батырхан Жұмабевқа алғысымызды білдіреміз. Ұлттық өнеріміз жасай берсін. Домбыра күніне арналған мерекелік шаралар әлі де жалғасын таппақ.