ДӘСТҮРЛІ ӨНЕР ДӘРІПТЕЛДІ

<<<< қосымша фотосуреттерді жүктеу >>>>

Дәстүрлі «Ғасырлар пернесі» қазақ халық аспаптары ансамбльдерінің облыстық фестивалі өтті.

Игілікті шара аясында облыстың әр түкпірінен келген ансамбльдер өнер көрсетті.

Мәдениет басқармасының тарапынан әр өнер ұжымына алғыс хат пен 70 мың теңгенің сертификаттары табысталды.
Бүгін «Алтын дән» мәдениет үйінде Қостанай аудандық Мәдениет және тілдерді дамыту бөлімінің ұйымдастыруымен «Рухани қазына» бағдарламалық мақаласын жүзеге асыру аясында «Ұлы дала үні» облыстық қазақ ұлт аспаптары ансамбльдерінің байқауы өтті.

Бұл шараны «Ғасырлар пернесі» фестивалінің әлқиссасы деуге болады.

Фестиваль барысында «Мұрагер» (Алтынсарин ауданы, жетекшісі: Айбек Сыздықов), «Мирас» (Қостанай қ., жетекшісі: Берік Оразалин), «Дала сазы» (Жангелдин ауданы, жетекшісі: Алмас Сейілхан), «Асыл мұра» (Қарабалық ауданы, жетекшісі: Әли Қаныбек), «Әйет» (Б. Майлин ауданы, жетекшісі: Арғынбек Бейбітхан), Ш.Қабылбаев атындағы Қостанай академиясы (жетекшісі: Қалибек Деріпсалдин), «Тобыл сазы» (Қостанай ауданы, жетекшісі: Ерхан Түсіпбеков) секілді қазақ ұлт аспаптары ансамблі өнер көрсетті. Әр өнер ұжымы күй шертіп, ансамбльдің сүймелдеуімен жеке дауыста әннен шашу шашты.

«Ұлы дала үні» облыстық қазақ ұлт аспаптары ансамбльдерінің додасы да қорытындыланды. Нәтижесінде Ш.Қабылбаев атындағы Қостанай академиясы мен «Әйет» ансамбльдері ІІІ орынға жайғасты.

Қарабалық ауданынан келген «Асыл мұра» ұжымы ІІ орынды тақымға басты.

Жангелдин ауданының намысын қорғаған «Дала сазы» ансамблі І орыннан көрінсе, қазылар алқасы Алтынсарин ауданының «Мұрагер» қазақ ұлт аспаптар ансамблін бас жүлдеге лайықты деп таныды.

Марапаттау рәсімінде сөз алған облыстық Мәдениет басқармасының басшысы фестиваль мен байқаудың маңыздылығын ерекше атап өтті.

Бір ғана байқаумен қазақ өнерінің көкжиегін кеңейтіп тастадық деуден аулақпыз, - деді Ерлан Болатұлы. - Мұндай маңызы ерек шаралар дәстүрлі мұрамызды жаңғыртудағы дариядай шаруаға тамған тамшымен тең. Барлық өнер ұжымдарына шығармашылық ізденіс пен шарықтау тілеймін!
Шара соңында бірлескен ансамбльдің сүйемелдеуімен «Атамекен» әні шырқалып, игілікті шараның мән-маңызын өз биігіне көтерді.

Нұрқанат НҮСІПХАН
фото:
Амангельды ТЕЛЬМАНОВ

Багдат АХМЕТБЕКОВ