Денисов ауданының дархан даласы күй күмбіріне бөленіп, төл өнер төрге озды. Барша көрермен ұлттық мұраның қайнарынан қанып ішіп, бір серпіліп қалғандай. Жергілікті күйші-композитор, сазгер Бекзат Ғазезовтың авторлық шығармаларына арналған облыстық домбырашылар фестивалі осындай көңіл-күй сыйлады.
Денисов ауданында 18 клуб бар
Мәдениеттің негізгі өзегі – тіл, тарих, дәстүр, әдебиет, руханият. Осы бір құндылықтар халықтың көкірек көзін ашып, рухын оятады, мінезін қалыптастырады. Сондықтан Денисов ауданының әкімдігі ұлт қазынасын ұлықтауға арналған облыстық деңгейде фестиваль ұйымдастырды. Бағдарламаның алғашқы бөлімі ауылдық мәдениет үйлері мен кітапханалардың қызметкерлеріне арналған әдістемелік семинардан басталды. Ауылдық клубтардың өкілдері жыл бойы атқарған жұмыстарын таныстырып, болашаққа бағыт-бағдар алды.
— «Облыстық халық шығармашылығы орталығының мамандары ауылдардағы мәдениет үйі қызметкерлерінің құжаттарын қарап, алдағы жоспарларымен танысты. Ұсыныс-тілектерін түртіп алдық. Алдағы жұмыстарына көмекші құрал ретінде әдістемелік сценарийлер топтамасын, ансамбльдер жинағын және көптеген материалдар әкеліп, табыстадық. Біздің орталық аудандық және ауылдық мәдениет үйлеріне әдістемелік – практикалық көмек көрсетуді жалғастыруда. Бұл бағытта «Зерделеу» бағдарламасы бар. Осы бағдарлама аясында Түйемойнақ өлкесіне келіп, мәдениет саласының бет-алысына өз бағамызды бердік», – деді облыстық мәдениет басқармасының халық шығармашылығы және кинобейнеқор орталығының басшысы Дәмер Қалқаев.
Денисов ауданында 18 ауылдық клуб бар. Олардың жанынан арнайы үйірмелер құрылып, жұмыс істеуде. Шығармашылық ұжымдар KPI бағдарламасымен шалғайдағы елді мекендерге гастрольдік сапарларға шығып, өңірдің мәдениет саласының дамуына өлшеусіз үлес қосуда. Облыстық мәдениет басқармасының өкілдері аталған жұмыстарды жоғары бағалап отыр.
— «Аудан әкімдігі ауылдық округтерде мәдениет ошақтарын сақтап қалуда. Денисов ауданы бойынша 18 мәдениет үйі бар деген сөз. Жергілікті биліктің мәдениет саласына көңіл бөліп отырғанын білдіреді. Былтырдан бері аудан басшылығы мәдени-техникалық базаны нығайту үшін қомақты қаржы бөлді. Аудан өнерпаздары облыстық, республикалық деңгейдегі іс-шараларға белсенді қатысып жүр. Әсіресе, «Түйемойнақ» театры республикалық «Мірдің оғы» сатиралық байқауында жүлдегер атанды. Аудан әкімшілігінің жүйелі жұмысының арқасында өнер кештері тұрақты ұйымдастырылуда. Күйші-композитор Бекзат Ғазезовтың авторлық шығармаларына арналған облыстық фестивальдің өтуі соның жарқын үлгісі», – деді облыстық халық шығармашылығы және кинобейнеқор орталығының басшысы.
Семинар қорытындысында халық шығармашылығын насихаттауға өлшеусіз үлес қосып жүрген бірқатар қызметкерлер марапатталды. Үздіктер қатарында Покров ауылдық мәдениет орталығының қызметкері Айман Ержанова, Алшан ауылының мәдениет үйінің ұйымдастырушысы Айсұлу Гатиятуллина, Жалтыркөл ауылдық мәдениет үйінің маманы Наталья Павленко бар. Семинар қатысушылары аудан тарихымен танысып, көрікті жерлерін тамашалады. Көпшілік назарына қолөнер шеберлерінің көрмесі де ұсынылды.
18 қатысушы өнер көрсетті
Күннің екінші жартысына жоспарланған іс-шаралар легі «Әлем» мәдениет үйінде жалғасты. Семинар Денисов ауданының мақтанышы, жергілікті күйші-композитор Бекзат Ғазезовтың авторлық шығармашылығына арналған «16 шақырым қашықтықтағы сағыныш» атты облыстық домбырашылар фестиваліне ұласты. Аудан әкімдігінің қолдауымен өткен ауқымды өнер кеші Тобыл-Торғай өңірінің рухты өнерпаздарын жинады. Соның ішінде домбыра аспабын шебер меңгерген күйшілер, жас таланттар басқосты. Қостанай, Лисаков қалалары мен Федоров, Қамысты, Жітіқара, Б.Майлин, Қарабалық аудандарынан келген қатысушылар шеберліктерін ортаға салды. Мұндай дүбірлі думанның Денисов ауданында өтуі де бекер емес.
— «Қазақтың ұлттық өнерін дәріптеп жүрген азамат, өзіндік үнімен ерекшеленетін бірегей тұлға Бекзат Ғазезов біздің ауданда, Приречен ауылында тұрады. Ол жерден көшкісі келмейді. Біз әртүрлі лауазымдар ұсынып, жоғары қызметке шақырғанбыз. Алайда, ол ауылда қалып шығармашылық жолын жалғай беруді қалады. Ауылдың табиғаты, орманды жердің сұлулығы сазгерді шабыттандырса керек. Жергілікті әкімдік тарапы өнер иесіне жан-жақты қолдау білдіруде», – деді Денисов ауданы әкімінің орынбасары Айгүл Биктимисова.
Өнер кешінің шымылдығын Денисов ауданы мәдениет үйінің «Түйемойнақ» ансамблі автордың «16 шақырым қашықтықтағы сағыныш» атты шығармасымен ашты. Күйшінің досы, айтыскер, асаба Медет Байзақов арнайы Қостанай қаласынан келіп, үзеңгілес жолдасына арнау айтты.
— «Бекзат біздің студент кезімізден бірге өскен дос, жолдас, әріптес бауырымыз. Былтыр аудан дәрежесінде шығармашылық кеші өткен еді. Биыл облыс деңгейіне көтеріліп, әр аудан-қаладан өнерпаздар жиналып отыр. Біздің Бекзат сегіз қырлы, бір сырлы жігіт. Өнерін жан-жақты дамытқан азамат. Ол күй де шығарады, ән де, сөз де жазады. Сурет те салады. Ұсталық шеберлігі де бар. Азаматтығы бір бөлек. Кезінде мен, Бекзат және Тайжан үшеуміз «Сағыныш» деген трио құрғанбыз. Сол кезде басталған достығымыз әлі күнге жалғасып келеді. Қазір отбасымызбен араласамыз», – деді Медет Байзақов.
«Баласы атқа шапса, анасы тақымын қысар» демей ме халқымыз. Фестивальге Бекзат Ғазезовтың анасы Астана қаласынан арнайы келіп, мейман болды.
Домбыра мен ортеке: көне өнер жаңғырығы
Фестивальдің ерекшелігі – қатысушылар Бекзат Ғазезовтың шығарған күйлерінің бірін орындады. Б.Майлин ауданынан келген өнерпаз Айбек Қабылдин автордың «Қалқа қыз» әнін және жітіқаралық Алмат Елшібаев «Гүлдей ару қыз» әнін нақышына келтіріп шырқады. Кеште жас таланттар бой көрсетіп, киелі күй өнерінің болашағына деген сенімді нығайта түсті. Лисаков қаласынан келген Жанерке Иниятова, Аружан Сейтқалиева көрерменнің көзайымына айналса, Жітіқаралық Дина Маликаджарова «Күміс тұяқ» күйінде ортекені ойнатты. Күйшінің «Міржақып» және «Ахмет» атты туындылары да әуелеп, Алаш арыстарының рухын жаңғыртқандай болды.
Бекзат Ғазезов он беске жуық күй мен ансамбльдерге арналған әртүрлі шығармалардың авторы. Сондай-ақ ортеке жасау шебері.
— «Осыдан үш жыл бұрын Қарағанды қаласында өткен «Ортеке» байқауына бардым. Сол байқауда ортеке туралы жадымнан тың туынды дайындап апарып, ортеке аспабында ойнап бердім. Он шақты жылдан бері қолөнермен айналысамын. Қарағандыда өткен сайыстан кейін менде ортекеге деген қызығушылық пайда болып, қолөнер шеберлігін шыңдауға кірістім. Дәл қазіргі уақытта ортекемен жұмыс істеп жатырмын. Ортеке жасаймын, оны ойнатамын. Ортекеге арналған үш шығармам бар. Келешек ұрпаққа киелі өнерді дәріптеу үшін Приречен ауылдық мәдениет үйінде домбыра және ортеке үйірмелерін аштым. Қазір бірталай жас ұлттық өнерді үйренуде», – дейді автор.
Бекзат Ғазезов – көп балалы әке. Приречен мәдениет үйінде жұмыс істейді. Оның шәкірттері домбыра тартуды шебер меңгеруде. Бүгінде күйшінің авторлық шығармаларын Денисов жастарымен қоса облысымыздың өнерпаздары орындап жүр. Туындыларын нотаға түсіріп, арнайы жинақ етіп шығарыпты. Келешек үшін құндылығы жоғары жинақ пен ортеке бұйымын фестиваль қатысушыларына сыйға тартты. Осы кешті ұйымдастыруға қолдау білдірген Денисов ауданының әкімдігі екенін еске саламыз.
Барлық қатысушыларға аудан әкімі Руслан Қатпаевтың атынан алғыс хаттар мен ақшалай сыйлықтар табысталды. Ал авторға қомақты қаржылай сыйақы ұсынылды. Құрметті марапаттарды аудан әкімінің орынбасары Айгүл Биктимисова делегаттарға өз қолымен тапсырды. Облыстық халық шығармашылығы және кинобейнеқор орталығының басшысы Дәмер Қалқаев кеш иесіне шапан жауып, облыстық композиторлар одағының төрағасы Арысбек Бағдәулетұлы Бекзат Ғазезовке одаққа қабылдау туралы куәлік пен төсбелгі берді. Бұл күні домбыра шанағынан төгілген сиқырлы үн Денисов баурайында қалықтап, ұзақ уақыт жаңғырып тұрды.
Қымбат ДОСЖАНОВА
Суреттерді түсірген – Василий ВАСИЛЬЕВ
Денисов ауданы
