
Қазақтың айтыс өнерінің көрнекті өкілі, суырыпсалма ақын, Қазақстанның халық ақыны, «Барыс» орденінің иегері, Қостанай облысының Құрметті азаматы Әсия Беркенованың дүниеден өтуіне байланысты қайғылы хабарды зор күйзеліспен қабылдадық.
Әсия Беркенова 1950 жылы Қостанай облысы Әулиекөл ауданының Ноғайкөл ауылында дүниеге келген. Қазақ қыздар педагогикалық институтын тәмамдаған. Ол сан мәрте республикалық және халықаралық ақындар айтысында топ жарып, жүлделі орындарға ие болып, қазақтың суырыпсалма өнерінің өркендеуіне өлшеусіз үлес қосты. «Қазақстанның халық ақыны» құрметті атағына және «Қазақстанның үздік халық ағартушысы» төсбелгісіне ие болды. Сонымен қатар Ахмет Байтұрсынұлы атындағы Қостанай мемлекеттік университетінің «Өнер» студиясын басқарып, жас таланттардың шығармашылық жолына бағыт-бағдар берді.
Ақынның алғыр ойы, ұшқыр шабыты, өткір тілі мен терең мазмұнды жырлары ұлттық өнеріміздің алтын қорынан лайықты орын алды. Ол айтыс өнерінің дамуына зор еңбек сіңіріп қана қоймай, кейінгі ұрпаққа өнегелі із қалдырған бірегей тұлға болды. Ақынның елдік пен бірлікті, ұлттық құндылықтар мен адамгершілікті арқау еткен шығармалары халық жадында мәңгі сақталады.
Қостанай қаласы әкімдігінің мәдениет және тілдерді дамыту бөлімінің «Мирас» қалалық Мәдениет сарайы» мемлекеттік коммуналдық қазыналық кәсіпорнының ұжымы марқұмның отбасы мен туған-туыстарына, жақындарына және барша қазақ өнерінің жанашырларына қайғыра көңіл айтады.
Қазақ өнерінің көрнекті өкілі, аяулы ақын Әсия Беркенованың жарқын бейнесі, өнегелі өмірі мен ұлт руханиятына сіңірген өлшеусіз еңбегі ел жадында мәңгі сақталады.
Иманы саламат, жаны жәннатта болсын!