Бүгін Ақтау қаласындағы Достық үйінде сағат 11:00-де ұлттық рух пен өнерді ұлықтайтын айтулы шара — «Маңғыстау – түркі мәдениетінің төрі» атты республикалық командалық айтыс өз шымылдығын түрді
Бұл дода — еліміздің әр аймағынан келген сөз шеберлерінің басын қосқан ерекше форматтағы мәдени шара.
Айтысқа Қазақстан құрамасы, Маңғыстау, Қарағанды және Түркістан облыстарының командалары қатысып, суырыпсалма өнердің озық үлгісін көрсетуде. Жиырма аймақ қатысқан іріктеу кезеңінен сүрінбей өткен топтар арасындағы супер финалдық сайыс қазіргі таңда қызып жатыр.
Шараға белгілі айтыскерлермен қатар, әнші-күйшілер, жыршы-термешілер, өнер саласының майталмандары жиналды.
Қостанай облысынан бұл рухани аламанға облыстық халық шығармашылығы орталығының қызметкері Мұрат Нағашыбай республикалық айтыс ақындары мен жыршы-термешілердің халықаралық одағының арнайы шақыртуымен тәжірибе алмасу мақсатында қонақ болып қатысуда.
– Республикалық командалық айтыс – көмескі тарта бастаған дәстүрлі өнерді жаңғыртуға бағытталған ауқымды мәдени жоба. Мұнда тек айтыс емес, бес түрлі ұлттық өнер түрі – жыр, терме, дәстүрлі ән, күй тартыс пен айтыстың түрлі үлгілері бір сахнада тоғысады. Бұл – бұрын-соңды болмаған ерекше формат.
Жоба «AMANAT» партиясының бастамасымен былтырдан бері қолға алынып келеді. Авторы – Қазақстанның еңбек сіңірген қайраткері Аманжол Әлтай. Ал барлық кезеңіне әділ төрелік етіп келе жатқан – айтыс өнерінің абызы, Жүрсін Ерман ағамыз.
– Командалық форматтың артықшылығы қандай?
– Бұл – ұжымдық шығармашылықты танытатын тың үлгі. Бір сахнада бес өнер түрі қатар көрініс табуы – көркемдікке жаңа серпін беріп, халықтың рухани дүниесін байыта түседі. Әр айтыскер өз командасымен бірге өнер көрсетіп, ұлттық мұраны жаңаша жеткізеді.
– Айтыстың қандай түрлері қамтылды?
– Сүре, түре, қайым, өтірік өлең секілді сирек кездесетін, тарихи терең айтыс түрлері қайта жаңғыртылды. Бұл жастар үшін де, көрермен үшін де тың дүние болды.
– Айтыстың Маңғыстауда өтуі туралы не айтасыз?
– Бұл – жай ғана таңдау емес. Маңғыстау – түркі мәдениетінің төрі. Осындай тарихи жерде ұлттық өнердің қайта түлеп жатқаны – өте орынды әрі мағыналы. Өңірдің мәдени салмағын арттыра түсті.
