Қазылар алқасының төрағасы, ақын, журналист Нұрқанат Құлабаев бастаған сарапшылар алқасы жас жүйріктердің сөз саптасын, суырыпсалмалық шеберлігін, ой тереңдігін бағалайтын болады.  
 

Бұл жыр бәйгесінде 12 жас талапкер айтыстың көрігін қыздырып, шабысты сөз сайысына түсуде. Олар Қостанай, Меңдіқара, Бейімбет Майлин, Жангелдин, Алтынсарин, Сарыкөл аудандары мен Арқалық қаласынан келген үміткерлер.  
 

Айтыстың алғашқы кезеңінде алты жұп сынға түсіп, өнер жарыстырады. Ал ақтық сында үздік деп танылған үш жұп шешуші бәсекеде бақ сынайды.  

«Жас тұлпар» айтысының шежіресіне көз жүгіртсек, бұл дода талай жас ақынның қанатын қатайтып, суырыпсалмалық өнерге баулып қана қоймай, елге танылуына жол ашқан.
1992 жылдан бері үздіксіз өтіп келе жатқан бұл жоба – шын мәнінде ақындық мектебі. Бүгінде осы мектептен түлеп ұшқан қаншама жүйрік үлкен сахналарда топ жарып, елдің ықыласына бөленіп жүр.  

Айтыстың мәресі мен мәртебесі жоғары болсын! Барлық жас ақындарға шабыт пен сәттілік тілейміз!