Жүрсін Ерман мен қазылар алқасы Қостанайдағы айтыстың жоғары деңгейде өткенін атап өтті
Бүгін алыстан ат терлетіп келген Жүрсін Ерман бастаған қазылар алқасы Алматы мен Астанаға аман-есен аттанды.
Оларды қошеметпен қарсы алып, риза көңілмен шығарып салдық. Қостанайға арнайы келген Жүрсін Ерман ағамыз да, Аманжол Әлтай да айтыстың жоғары деңгейде өткенін айтып, шынайы ризашылықтарын білдіріп, баталарын берді.
Бұл дүбірлі дода ел руханияты үшін ерекше оқиға болды. Айтыс – сөз өнерінің шыңы, халықтың рухын көтеретін ұлттық мұрамыз. Осы мәдени іс-шараның табысты өтуіне үлес қосқан барлық азаматтарға алғысымыз шексіз!
Айтыстың ұйымдастырылуында Қостанай ауданының «Алтын дән» мәдениет үйінің ұжымы ерекше еңбек сіңірді. Сондай-ақ, ақындар алаңын әзірлеп, тиісті жағдай жасаған облыстық әкімдіктің шаруашылық бөлімінің қызметкерлеріне ризашылығымызды білдіреміз.
Іс-шараның жоғары деңгейде өтуіне атсалысып, бірлесе жұмыс атқарған І.Омаров атындағы облыстық қазақ драма театрына, мазмұнды көрме ұйымдастырған облыстық Ы.Алтынсарин музейіне, Арқалық қаласындағы өлкетану музейіне, облыстық тарихи-өлкетану музейіне және осы ұжымдардың қызметкерлеріне шынайы алғысымызды айтамыз.
Айтыстың болатындығы белгілі болған күннен бастап, бұл игі іске қолдау көрсеткен аудандық, қалалық мәдениет бөлімдері мен әкімшіліктерге, өз өнерпаздарына демеу көрсеткен барша жанашырларға зор ризашылығымызды білдіреміз.
Сонымен қатар, айтысты насихаттауға атсалысқан бұқаралық ақпарат құралдарына, журналистерге, фото және бейнеоператорларға, әр сәтті халыққа жеткізген тілшілерге үлкен алғысымызды айтамыз.
Бұл – барша қазаққа ортақ рухани мереке. Осындай өнер кешін жоғары деңгейде өткізу арқылы бірлігімізді, ұлттық құндылықтарға деген құрметімізді тағы бір дәлелдей алдық.
Көктемнің алғашқы мерекесі – Алғыс айту күнінде облыстық халық шығармашылығы орталығы осы шараның табысты өтуіне үлес қосқан барша жанға шынайы алғысын білдіреді. Ұлттық өнеріміз жасап, халқымыздың рухани қазынасы байи берсін!
