Қостанай қаласында Қостанай және Түркістан облыстары ақындарының командалық айтысы өтті.
Бұл мәдени іс-шарада екі өңірдің ақындары мен дәстүрлі өнерпаздары қайым, түре, сүре, қыз бен жігіт айтысы секілді айтыс түрлерінде сынға түсті. Сонымен қатар, жыршы-термешілер, дәстүрлі әншілер мен күйшілер де өз өнерлерін көрсетті.
Қостанай облысының командасын белгілі ақын Айбек Қалиев бастап шықса, түркістандық өнерпаздарды айтыскер ақын Тұрар Тлеулиев бастап келді.
Қазылар алқасының төрағасы – Қазақстанның еңбек сіңірген қайраткері, «Құрмет» орденінің иегері Жүрсін Ерман.
Жыр додасын белгілі айтыскер ақын, филология ғылымдарының докторы, профессор, Қазақстанның еңбек сіңірген қайраткері Аманжол Әлтай тізгіндеді.
Айтыс нәтижелері:
Сүре айтыста қостанайлық Айбек Қалиев пен түркістандық Бекарыс Шойбеков тең түсті.
Түре айтыста қостанайлық Айбар Рағатов пен түркістандық Қажымұқан Абзалов сынға түсіп, Қажымұқан Абзалов жеңіске жетті.
Қыз бен жігіт айтысында қостанайлық Жібек Шахмарданқызы мен түркістандық Дәурен Ақсақалов бақ сынасып, Дәурен Ақсақалов жеңді.
Қайым айтыста қостанайлық Батырлан Сағынтаев пен түркістандық Аян Ниязбек айтысып, Батырлан Сағынтаев жеңіске жетті.
Дәстүрлі өнер сайыстары:
Күй сайысында қостанайлық Данияр Рысбеков пен түркістандық Шыңғыс Исаев тең түсті.
Дәстүрлі ән орындауда қостанайлық Қыдырбек Қиысхан мен түркістандық Оразалы Жаңабай тең өнер көрсетті.
Жыршылық өнерде қостанайлық Абзал Алпыс түркістандық Аязбек Рустамовты жеңді.
Терме орындауда қостанайлық Манапбек Кәдіров пен түркістандық Руслан Ахинбеков өнер көрсетіп, тең түсті.
Жалпы командалық есеп:
Қазылар алқасының шешімі бойынша Қостанай командасы – 194 ұпай, Түркістан командасы – 196 ұпай жинады. Осылайша, Түркістан облысының командасы жеңіске жетті.
Қостанай облыстық Мәдениет басқармасының басшысы Құралбек Атамұратов жеңімпаз командаға жолдаманы табыстады.
Барша өнерпаздарды өнер мерекесімен құттықтаймыз!
