Облыстық ақындар айтысы басталды

Бүгін, 15 қарашада, Қостанай облысының Б.Майлин ауданында атақты жазушы және ақын Бейімбет Майлиннің 130 жылдығына арналған «Бейімбеттің биігі» атты облыстық ақындар айтысы басталды.

Мерейтой аясында ұйымдастырылған бұл айтысқа өңірдің ең танымал ақындары шықты.

Айтысты облыстық мәдениет басқармасының басшысы Құралбек Атамұратов құттықтау сөзбен ашты.

Айтыстың мақсаты – Бейімбет Майлиннің шығармашылық мұрасын дәріптеп, қазақ әдебиетіне қосқан зор үлесін жас ұрпаққа жеткізу.

Өтіп жатқан додаға Бейімбет Майлин бабамыздың ұрпақтары да келіп, арнайы қатысуда.

Айтыс екі кезеңнен тұрады: іріктеу айналымы мен ақтық сайыс. Қазылар алқасы ақындардың тақырыпты аша білуін, сөз тапқырлығы мен сахна мәдениетін бағалайтын болады. Жеңімпаздар мен жүлдегерлер арнайы марапаттармен және жүлде қорымен марапатталады.

Ақындарды сынға алатын қазылар алқасы:

Мауданов Абылай Фазылханұлы – қазылар алқасының төрағасы, Қазақстан жазушылар одағының мүшесі, ақын, сатирик, журналист, аудармашы;

Құлабаев Нұрқанат Жүнісұлы – ақын, журналист, Республикалық «Егеменді Қазақстан» газетінің меншікті тілшісі.

Ахметбеков Айбатыр Ниязбекұлы - Б.Майлин аудандық «Әйет шамшырағы» газетінің бас редакторы, ақын, журналист.

Бұл айтыс қазақ өнерін дәріптеу мен рухани құндылықтарды сақтау жолындағы маңызды қадамдардың бірі болмақ.