Торғайдың топ жарғаны, халық ақыны – Нұрхан Ахметбековтің 120 жылдығына арналған «Жас тұлпар» облыстық оқушылар айтысы биыл Арқалық қаласындағы «Арқалық қазақ жасөспірімдер театрында» өтті.

Облыстық мәдениет басқармасы мен білім басқармасының және облыстық көркемөнерпаздардың халық шығармашылығы мен кинобейнеқор орталығының ұйымдастыруымен оқушылардың жыр додасына Қостанай, Рудный, Арқалық қалалары мен Бейімбет Майлин, Жангелдин, Жітіқара, Қостанай аудандарынан 9 үміткер қатысты.

Қазылар алқасының төрағасы ақтаңгер ақын — Айбек Қалиев және құрамында Батырлан Сағынтаев, Асылхан Сәлімжан.

«Жас тұлпар» ақындар айтысы өңірдегі талай талапкер жасты үлкен өнерге, өмірге қанаттандырып келеді. «Жас тұлпар» түлеткен жас ақындардың көбі - бүгінде осы өңірге ғана емес, еліміздің әр түкпірінде өрелі өнерімен, адал еңбегімен танылып, өзінің ақындық, азаматтық биігіне қол жеткізген азаматтар. Сонау 1992 жылдан бері үзілмей келе жатқан оқушылар айтысын нағыз өнер мектебі деп бағалауға болады.

Айтысқа шыққан оқушылар Нұрхан Ахметбековты жырға қосып, асыл мұрасын дәріптеді.

• Бас жүлде – Нұрислам Рагатов, Арқалық қаласы;

• І орын – Перизат Амин, Бейімбет Майлин ауданы;

• ІІ орын – Шұғыла Аманбек, Қостанай ауданы;

• ІІІ орын – Жанерке Сейсенбай, Жітіқара ауданы және Дінасыл Бақытбек, Қостанай қаласы;

• Ғ. Ахметчин атындағы арнайы жүлде – Таңжарық Ниязбек, Жангелдин ауданы; Қалған қатысушылар қатысқаны үшін марапатталды.

Барлық жетекшілерге шәкірт тәрбиелегендері үшін алғыс хат табысталды.

Аталмыш іс-шараны өткізуге мұрындық болған Арқалық қаласының әкімшілігіне, Мәдениет сарайы мен театрдың ұжымына алғыс білдіреміз.