Айтыс бастау алды
Облысымызда тұңғыш рет «Отбасы – берекенің қайнар бұлағы» атты отбасылық ақындар айтысы Алтынсарин ауданында бастау алды.
Бүгінгі жыр-додасына түсетін ақындарымыз бір-біріне бөтен емес. Айтыстың ерекшелігі де сол. Бір отбасынан шыққан, ұрпақтар сабақтастығын жалғап келе жатқан туғандар айтыстың көрігін қыздырмақ. Додаға барлығы төрт жұп шықпақшы.
Бейімбет Майлин ауданынан Мамай Ізтілеу, бірнеше облыстық, республикалық айтыстардың жеңімпазы. Айтыс сахнасында 20 жылдан астам өнер көрсетіп келе жатқан ақынымыздың бұл күнде жеткен жетістіктері орасан. Ол туған інісі Амангелді ауданынан келген Балтазар Ізтілеуовпен шығады. Облысымызға танымал Балтазар ақынның бұл күнде жетістіктері өте көп. Республикалық «Жастар жырлайды» телевизиялық жобасының қатысушысы. Облыстық айтыстардың бірнеше дүркін жүлдегері.
Келесі ақынымыз Қазақ айтысында өзіндік қолтаңбасы бар ақын қызымыз Салтанат Өтелбаева, бірнеше республикалық айтыстардың жүлдегері. Қазақстан Республикасының Мәдениет саласының үздігі. Салтанаттың қарсыласы ұлы Нұрсұлтан Қасым. Нұрсұлтан айтыс өнерімен қоса, жыр, терме бағытында да жетістіктерге жеткен. республикалық, облыстық ақындар айтысы мен жыр-терме байқауларының жүлдегері.
Елорда Нұр-Сұлтан қаласынан келген ақындар да бар. Барлықтарыңызға жақсы таныс, Торғайдың Топжарған дүлдүлі —Тоба Өтепбаев. Өңірімізге кеңінен танымал айтыскер ақын. Бірнеше облыстық республикалық айтыстардың жеңімпазы. Тоба аяулы жары — Жібек Шаһмарданқызымен жұп. Жібек те осал емес. Бірнеше республикалық айтыстардың жүлдегері. Айтыс сахнасында оқушы кезінен шыққан. Қостанай елінде тұңғыш рет өнер көрсетпек. Қадамы сәтті болсын дейміз.
Алтынсарин ауданының намысын қорғайтын ақындар Серік Алпысов, ән әлемінде өзіндік өрнек құрып жүрген Серіктің, ақындық өнері де ерекше. Бірнеше шоу-айтыстардың қатысушысы. Оның қарсыласы Серіктің туған інісі, жыршы, термеші Әбдірахман Алпыс, көптеген жыр-терме байқауларының жүлдегері және жеңімпазы.
Облысымызда тұңғыш рет өткізіліп отырған ерекше айтысты Бейімбет Майлин ауданынан келген сақа ақын. Мамай Ізтілеу бастады. Ақындарға сәттілік тілейміз.
