«Жас тұлпардың» отызыншы белесі

Тобыл-Торғай өңірінде ақындар мектебінің қалыптасуына ықпал еткен «Жас тұлпар» облыстық оқушылар айтысының тұсауы кесілгеніне биыл отыз жыл толып отыр.

Ең алғаш 1992 жылы өткізілген жас өнерпаздар додасы желісін үзбей, дәстүрлі өлең-жыр думанына айналды. Көптеген өреннің талабын ұштап, қабілетін шыңдауға, шабытын қамшылауға септігін тигізді.

Өңірде айтыскер ақындар ортасының кеңеюіне, талай «бұлақтың көзін ашуға» себепші болды. Осы жоба аясында айтыскер ақындардың бірнеше буыны қалыптасты. Сол сабақтастық әлі күнге үзілмей келеді.

Мәселен, бүгінде облыстың ғана емес, тұтас елдің көзайымына айналған Салтанат Өтелбаева, Қыдырбек Қиысхан, Марғұлан Оспанов, Тоба Өтепбаев секілді көптеген танымал таланттар өнер өлкесіне осы аламан арқылы алғашқы қадамын жасады. Олар республикалық, халықаралық өнер бәйгелерінде топ жарып жүр.

Араларында соңына шәкірт ертіп, балғын өнерпаздарға тәлім беріп жүрген тұлғалар бар. Жалпы, «Жас тұлпардың» әлі күнге дейін ел ішінен жас дарындарды анықтап, жаңа есімдерді танытуға қосып жатқан үлесі мол.

Тәуелсіздіктің алғашқы кезеңдерінен бастап тұрақты түрде өткізіліп келе жатқан оқушылар айтысы жыл сайын әртүрлі маңызды тақырыптарды арқау етіп отырды. Мысалы, өткен жылғы додада талапкерлер ұлы ағартушы Ыбырай Алтынсариннің 180 жылдығын жырға қосқан еді.

Осымен отызыншы рет ұйымдастырылғалы отырған облыстық «Жас тұлпар» оқушылар айтысы ұлт көсемі Ахмет Байтұрсынұлының 150 жылдығына арналмақ. Дәстүрлі дода биыл сәуір айында өткізіледі деп жоспарлануда.

Түбітқанат талапкердердің өлең сайысынан бөлек, арнайы шақыртылған тәжірибелі ақындардың қатысуымен шеберлік сабақтарын ұйымдастыру да көзделіп отыр. Сондай-ақ, жас айтыскерлерге әдеттегідей елге танымал, айтулы ақындар төрелік ететінін айта кеткен жөн.