2025 жыл Қостанай облысының мәдениеті мен халық шығармашылығы саласы үшін мазмұнды да нәтижелі болды десе де болады. Жыл бойы атқарылған жұмыстар ұлттық мәдени мұраны сақтау мен дамытуға, дәстүрлі өнердің сабақтастығын нығайтуға, дарынды өнерпаздарды қолдауға және өңір тұрғындары үшін шығармашылықты нығайтуға бағытталды.
Жыл шымылдығы 20 ақпан күні Федоров ауданында өткен жетіген аспабында орындаушылардың облыстық «Жетігеннің үні» байқауымен ашылды. Бұл байқау 2025 жылғы мәдени бағыттың негізгі басымдықтарын айқындап, дәстүрлі өнерді дәріптеу, орындаушылық шеберлікті арттыру және жастарды ұлттық өнерге тарту жолындағы жүйелі жұмыстың бастамасы болды.
Жыл бойы халықаралық, республикалық, облыстық, өңірлік және қалалық деңгейдегі түрлі мәдени іс-шаралар ұйымдастырылды. Атап айтқанда, байқаулар, фестивальдер, айтыстар, гала-концерттер, шығармашылық кештер, шеберлік сабақтары мен кездесулер өтті. Бұл шаралар вокал, хореография, поэзия, айтыс, жыр-терме, аспаптық және театр өнері сынды сан алуан жанрларды қамтыды.
Облыстық халық шығармашылығы орталығының мониторинг бөлімінің деректеріне сәйкес, 2025 жылы барлығы 44 негізгі іс-шара өткізілген, оның ішінде:
халықаралық – 3;
республикалық – 9;
облыстық – 12;
өңірлік – 4;
қалалық – 1;
шығармашылық кездесулер – 1;
шеберлік сабақтары – 11;
сұхбаттар – 3.
Жылдың ірі мәдени оқиғалары
Жылдың ең айтулы оқиғаларының бірі – Халықаралық «Алтын микрофон – 2025» вокалдық байқауы болды. Бұл байқау музыка мен шабыттың жарқын мерекесіне айналып, талантты орындаушыларды, кәсіби қазылар алқасын және көпшілік көрерменді бір арнаға тоғыстырды. Байқауға қатысқан алыс-жақын шетелдер мен еліміздің өзге өңірлерінен келген қонақтар ұйымдастыру деңгейіне жоғары баға берді.
«Алтын микрофон» жыл сайын қатысушылар географиясын кеңейтіп, халықаралық мәдени кеңістіктегі беделін нығайтып келеді. Қазіргі таңда бұл жоба – Қостанай облысының танымал мәдени брендіне айналып, жаңа есімдерді ашып, қазақ өнерін әлемге танытып отырған ауқымды алаң.
Міржақып Дулатұлының 140 жылдығына арналған іс-шаралар
2025 жылғы мәдени күн тәртібінде ұлт руханиятының ірі тұлғасы Міржақып Дулатұлының 140 жылдығына арналған шаралар айрықша орын алды. Осыған орай республикалық айтыстар, жыр-терме байқаулары, гала-концерттер және республикалық ақындар мүшәйрасы «Рухқа толы жалын жырлары» ұйымдастырылды.
«Рухқа толы жалын жырлары» республикалық мүшәйрасы
Аталған мүшәйра Міржақып Дулатұлының әдеби мұрасын насихаттауға, жас ақындарды қолдауға, қазақ поэзиясының дамуына серпін беруге және ұлттық рухты нығайтуға бағытталды. Байқау ел көлеміндегі талантты қаламгерлерді біріктіріп, мазмұнды шығармаларымен ерекшеленді.
Шығармашылық және мерейтойлық кештер
Жыл ішінде өңірдің рухани өмірінде елеулі орын алған бірқатар шығармашылық және мерейтойлық кештер өтті:
Ұлы Отан соғысының ардагері, Қостанай облысының Құрметті азаматы Қасымхан Алдабергенұлының 100 жылдығына арналған «Қазыналы қарт майдангер» кездесуі;
Қазақстан Жазушылар одағының мүшесі, ақын Серікбай Оспановтың 80 жылдығына арналған «Тобыл ағады» шығармашылық кеші;
Қазақстанның халық ақыны, «Құрмет» және «Барыс» ордендерінің иегері Әсия Беркенованың 75 жылдығына арналған салтанатты шаралар;
ҚР мәдениет қайраткері, «Қазына» сыйлығының лауреаты, айтыскер-ақын Әлпия Қарбозқызы Орманшинаның 70 жылдығына арналған «Мен даламның қызымын» атты мерейтойлық кеш.
Театр өнері
Мендықарин ауданында өткен Сейіт Кенжеахметов атындағы «Мірдің оғы» республикалық сатира және юмор театрлары байқауы театр өнерінің дамуына серпін берді. Байқауға еліміздің түрлі өңірлерінен сегіз театр ұжымы қатысып, бұл жоба Қостанай облысында бесінші рет жоғары деңгейде ұйымдастырылды.
Негізгі көрсеткіштер
2025 жылы облыс көлемінде 16 520 мәдени іс-шара өткізіліп, оларды 2 071 227 көрермен тамашалады.
Облыста барлығы 1 236 клубтық құрылым жұмыс істейді, оған 13 930 адам қатысады.
Соның ішінде:
балалар клубтық құрылымдары – 624 (6 933 қатысушы);
ересектер клубтық құрылымдары – 612 (6 997 қатысушы).
Жыл ішінде домбыра, жетіген, қобыз, вокал, айтыс, хореография бағыттары бойынша және «Алтын микрофон» жобасы аясында 11 шеберлік сабағы өткізілді.
Жетістіктер
2025 жылы Қостанай облысының шығармашылық ұжымдары мен жеке орындаушылары республикалық және халықаралық байқауларда 17 жүлделі орынға ие болды:
Гран-при – 3;
I орын – 4;
II орын – 1;
III орын – 9.
Жыл қорытындысы
Жылдың қорытындысы «Шаңырақ» ұлттық өнер орталығы ұйымдастырған, шығармашылық отбасыларға арналған «Қос жүректің әуені» атты концерт болды. Бұл кеш – өнер мен өмірді қатар өрген отбасылық дуэттердің басын қосқан, жылулық пен рухани сабақтастықты дәріптеген тағылымды мәдени шараға айналды.
Жыл бойы өткен байқаулар мен фестивальдердің үздік ұжымдары мен өнерпаздары дипломдармен, алғыс хаттармен және бағалы сыйлықтармен марапатталды.
2025 жылдың тағы бір маңызды жетістігі – Облыстық халық шығармашылығы орталығының республикалық деңгейде мойындалуы. «Рухани қазына – 2025» республикалық фестивалінде Қалқаев Дәмер Елтайұлы жетекшілік ететін орталық «Үздік облыстық мәдени-демалыс кешені» номинациясы бойынша жеңімпаз атанып, арнайы дипломмен марапатталды. Бұл — үлкен жетістік.
Барша қатысушыларға, ұйымдастырушыларға, серіктестерге, шығармашылық ұжым жетекшілеріне, меценаттарға және көрермендерге өңір мәдениетінің дамуына қосқан үлестері үшін шынайы алғыс білдіреміз.
Облыстық халық шығармашылығы орталығы баршаңызды Жаңа жылмен құттықтайды!
Жаңа жыл жаңа идеялар, тың жобалар мен шығармашылық табыстарға толы болсын! Алдағы уақытта да бірлескен жұмыстарымыз жалғасын тауып, мәдениет саласындағы игі бастамалар еселене берсін!
