Қостанай төрінде "Алтын микрофон" ХVІІІ Халықаралық әншілер байқауы аяқталды. Дәстүрлі фестиваль жоғары деңгейде өтті. Биылғы ауқымды іс-шараның өңір мәдениетінің тарихына ұмытылмас оқиға ретінде таңбаланары сөзсіз.
Ел көлемінен және алыс-жақын шетелдерден жиылған 40 қатысушының ішінен үздіктері іріктеліп, жеңімпаз анықталды.
Байқауға төрелік етуге келген халықаралық деңгейдегі қазылар алқасы зор еңбек сіңірді. Олар да өз кезегінде жас әншілер сынының ойдағыдан да артық өткенін айтып, ризашылықтарын, жылы лебіздерін жеткізді. Бүгін құрметті меймандардың соңғы легін зор алғысымызды білдіріп, жолға шығарып салдық. Облыс басшыларды да байқаудың биік деңгейде өткенін тілге тиек етті.
Фестивальдің жоспардағыша өтуіне барлық күш-жігерін жұмылдырып, белсенділікпен атсалысқан бүкіл әріптестерімізге, жан-жақты қолдау-демеу көрсеткен облыс басшылығына көптен-көп рахмет айтамыз. Сондай-ақ, Е.Өмірзақов атындағы облыстық филармонияның, І.Омаров атындағы қазақ драма театрының, облыстық қуыршақтар театрының, Тобыл қаласындағы "Алтын дән" мәдениет үйінің басшылары мен қызметкерлеріне де бірлікті іске білек сыбана кірісіп, үлкен үлес қосқаны үшін алғыс білдіргіміз келеді. Өңірдің абыройы сынға түсетін ауқымды іс-шараларда әрдайым бір жеңнен қол, бір жағадан бас шығарып, ынтымағымыз бен әлеуетімізді, білігіміз бен бірлігімізді таныта берейік!
