Қазақтың көрнекті ақыны, жазушы, драматург, көсемсөзші-журналист Ақылбек Шаяхмет 17 маусымда 70 жасқа толады. Арынды, жалынды, қаламы қарымды, ойлары шалымды сөз зергерін Қостанай облысының мақтанышы деуге болады.
Ақылбек Қожаұлы 1951 жылы Қостанай облысының Жітіқара ауданында Желқуар ауылында 1951 жылы дүниеге келген. Аудан орталығындағы қазақ мектебін бітіргеннен кейін «Шевченко» кеңшарында шопан болып жұмыс істейді. 1968 жылы оны Әулиекөл аудандық газетіне қызметке шақырады. Одан кейін Алматы облыстық «Жетісу», Қостанай облыстық «Қостанай таңы» газеттерінде, облыстық телекомпанияда қызмет еткен. Алматыда Қазақ мемлекеттік университетінің журналистика факультетін және Москвада Әдебиет институтын бітірген. Қазақстан жазушылар одағының мүшесі. Филология ғылымдарының кандидаты. «Ана тілі» газетінің лауреаты. «Дала қоңырауы» газетінің тұңғыш ұйымдастырушысы және редакторы болды. Ахмет Байтұрсынов атындағы медальмен, «ҚР тәуелсіздігіне 10 жыл» және «Ерен еңбегі үшін» медальдерімен марапатталған. Бұқар жырауға, Бейімбет Майлинге, Нұржан Наушабайұлына арналған республикалық мүшайралардың жеңімпазы. 2007 және 2008 жылдары өткен республикалық ұлттық «Астана-Бәйтерек» байқауының жеңімпазы. 2008 жылы өткен «Бір өлең – бір әлем» республикалық мүшайрасының және «Дарабоз» балалар әдебиеті бәйгесінің жүлдегері.
Қаламгердің «Есте қалар ел тарихы», «Ел есіндегі есімдер», «Тыңда туған», «Пирамида», «Көзімді ашып-көргенім», «Жұлдызды дәуір», «Жер-бесік», «Мөлдір бұлақ» деп аталатын прозалық, өлеңдер және поэмалар жинақтары оқырмандардың ықыласына бөленді. Балаларға арналған "Күлімдеді күніміз", "Гүл мен бидай", "Біздің бақша", "Шынар", "Аяз және Қыдыр" атты кітаптары жарық көрген. Өлеңдері орыс мектептеріне арналған оқулықтарға енгізілген. "Ақсұлу" тарихи драмасының, "Алғыс пен Қарғыс немесе жарық пен көлеңке", "Таза бұлақ", "Өкініш", "Еңбек ер атандырады" сынды бірнеше пьесаның авторы.
Естеріңізге саламыз, ертең, яғни 17 маусымда сағат 16.00-де Қостанай қаласындағы "Жастар сарайы" ғимаратында ақынның 70 жасқа толу мерейтойына арналған шығармашылық кеш өтеді. Келіңіздер, көркем кештің куәсі болып, өлең-жырдың кәусарынан сусындап қайтыңыздар!
