2021 жылдың 25-26 наурыз күндері Ыбырай Алтынсариннің 180 жылдығына арналған «Жас тұлпар» облыстық оқушылар айтысы өтеді
Қостанай облысы әкімдігінің мәдениет басқармасы» ММ, «Қостанай облысының білім басқармасы» ММ қолдауымен қазақ халқының бірегей, дегдар өнер түрлерінің бірі айтыс жанрын дамыту және көркем әдеби тіліміздің мәртебесін көтеру, жас ұрпаққа жеткізу, Қостанай өңіріндегі жас таланттарды анықтап, қолдау көрсету мақсатында «Жас тұлпар» облыстық оқушылар айтысы 1992 жылдан бастап өткізіліп келеді.
Айта кетсек, 2019 жылы Ұзынкөл аудандық мәдениет үйінде Фариза Оңғарсынованың 80 жылдығына арналған «Жас тұлпар» облыстық оқушылар айтысында Бас жүлдені Бауыржанұлы Бекзат (Жангелдин ауданы), І орынды Нағашыбай Ғанимат (Меңдіқара ауданы), ІІ орынды Жүрсін Ақжүніс (Ұзынкөл ауданы), Ратбек Бекзат (Бейімбет Майлин ауданы), ІІІ орынды Адырбаева Құндыз (Сарыкөл ауданы), Әсет Еркебұлан (Бейімбет Майлин ауданы), Мысыр Доспол (Қостанай ауданы) иеленген болатын.
2020 жылы жоспарланған Ы.Алтынсарин негізін қалаған тұңғыш мектебінің 135-жылдығына арналған «Жас тұлпар» облыстық оқушылар айтысы елдегі төтенше жағдайға байланысты өткізілмеді.
Биылғы жылы 25-26 наурыз күндері өтетін Ыбырай Алтынсариннің 180 жылдығына арналған «Жас тұлпар» облыстық оқушылар айтысына өтінімдер қабылдануда. Айтыстың негізгі мақсаты: Болашақ ұрпаққа айтыс өнерін жеткізу, оқушылардың шығармашылық қабілетін дамыту, ағартушы-педагог, этнограф, фольклоршы Ы.Алтынсариннің мәдени мұрасын дәріптеу және өз ойын поэзия тілімен шебер жеткізе алатын оқушы ақындарды анықтау болып отыр.
Сонымен қатар жас ақындардың шеберлігін шыңдау мақсатында айтыс аясында шеберлік сағаты өтеді.
