Маусым айында Қамысты ауданында бұрын-соңды болмаған ерекше бастама – «Бабалар ізімен» атты тың жоба өз жорығын бастамақ.
Бұл рухани экспедицияның басты мақсаты – халқымыздың салт-дәстүрін, сал-серілік өнерін, ұлттық құндылықтарды насихаттау және жастарға үлгі болу.
Жоба аясында өнерпаздар бес атпен жолға шығып, Қамыстыдан бастап өңірдің бірнеше аудан-қалаларын аралап өтеді. Қатысушылардың қатарында ақын, термеші, әнші, жалпы шығармашыл азаматтар бар. Олар жол бойындағы киелі орындарға, зираттарға тоқтап, бабалар рухына тағзым етіп, құран бағыштайды. Сонымен қатар әрбір елді мекенде жергілікті халықпен жүздесіп, рухани кештер өткізіп, ұлттық өнерді насихаттайды.
– Бұл – халқымыздың бай мұрасын ұлықтауға бағытталған ерекше форматтағы сапар. Бізге аудан әкімдігі қолдау көрсетіп, жобаны жүзеге асыруға мүмкіндік берді. Арнайы сыйлықтар да әзірледік. Мәселен, Қамысты ауданының 70 жылдығына орай тапсырыспен дайындалған домбыралар өнерлі азаматтарға тарту етіледі. Бұл бастама – Домбыра күнімен де үйлесіп отыр. Егер биылғы сапар сәтті өтсе, келер жылы Арқалық, Аманкелді, Жанкелдин аудандарына жол тартпақпыз, – дейді жоба жетекшісі, Қамысты аудандық мәдениет үйінің директоры Еркебұлан Кәрімұлы.
Маршрут бағыты 30 маусым күні Қамыстыдан шыққан керуен алдымен Денисов ауданына жетіп, сол жерде киіз үй тігіліп, ұлттық тағамдар ұсынылып, салтанатты кездесу өтеді. Одан кейінгі күні Лисаков қаласына аялдап, Тобыл стансасында тоқтап, сол кеште Рудныйға жетпек. Ал жобаның соңғы нүктесі – Қостанай ауданы. 2 шілде күні керуен сонда тоқтап, «Бабалар ізімен» жобасы өз мәресіне жетеді.
Жалпы жоба аясында өнерпаздар екі қала мен бес ауданды аралап, дала төсінде салт атпен жүріп өтіп, қазақ даласының сұлулығын да, өнері мен дарқан көңілін, салт-дәстүрін паш етпек.
