Облыстық кезең озаттарды күтеді

«Рухани қазына-2022» мәдениет және өнер ұйымдары мен қызметкерлерінің республикалық фестивалінің облыстық кезеңіне дайындық шаралары басталды.

Айта кетейік, бұл ауқымды фестиваль ҚР Мәдениет және спорт министрлігі Мәдениет комитетінің ұйымдастыруымен Мәдениет және өнер қызметкерлері күні қарсаңында жыл сайын өткізіледі.

Ұйымдастырушылар өңірлердегі іріктеу кезеңі үшін әр облысқа байқаудың ереже-талаптарын жібереді.

Жалпы, бұл фестивальдің мақсаты – еліміздегі мәдениет және өнер саласы қызметкерлерінің басын қосып, үздік мамандар мен ұжымдарды ардақтау, өзара тәжірибе алмасу және өңірлердегі мәдени нысандардың имиджін нығайтуға бағытталған әлеуметтік-мәдени және білім беру жобаларының озық үлгілерін насихаттау.

Республикалық сайысқа өңірлік деңгейде жеңімпаз болып анықталған мәдениет ұйымдары мен қызметкерлері қатысады. Облыстық деңгейде өтетін байқауда да бірнеше аталым және арнайы жүлделер өз иелерін табады.

«Рухани қазына-2022» байқаудың облыстық кезеңіне қатысу үшін барлық үміткер 2022 жылдың 8 сәуіріне дейін облыстық халық шығармашылығы орталығына өтінімдерін жолдауы қажет. Айта кету керек, өтінім байқау қағидасындағы үлгілерге сай ұсынылуы шарт.

Бұл фестивальде Тобыл-Торғай өңірінің мәдени ұжымдары мен қызметкерлерінің жылда жеңіс тұғырынан көрініп, өздерінің біліктілігі мен биік деңгейлерін көрсетіп жүргенін мақтанышпен айта аламыз.

Осы жылы да жеңіс жолын жалғайтын үміткерлеріміздің қатары көп болады деп сенеміз. Әр қатысушыға сәттілік тілейміз!