Бүгін Қостанай қаласына арнайы сапармен «Күйшілер одағы» республикалық қоғамдық бірлестігінің төрағасы, ҚР Мәдениет саласының үздігі Асқар Кенжеғалиев келді

View this post on Instagram

A post shared by Culture Qostanai (@culture_qostanai)

Сапар мақсаты – өңірде ұйымдастырылып отырған «Күмбірле, қоңыр домбыра» атты облыстық күй байқауына төрағалық ету және Қостанай облыстық күйшілер одағының жұмысын бағалап, бағыт-бағдар беру.

Сапар аясында Қостанай облыстық мәдениет басқармасында күйшілердің қатысуымен кеңейтілген алқа отырысы өтті. Жиынға басқарма басшысының міндетін атқарушы Саят Жүсіпов, облыстың белгілі домбырашылары, өнер үйірмелерінің жетекшілері, оқытушылары қатысты. Басқосудың модераторы – облыстық халық шығармашылығы орталығының басшысы Дәмер Қалқаев болды.

Жиын барысында Қостанай облыстық күйшілер одағының төрағасы Батырбек Байназаров атқарылған жұмыстар бойынша есеп беріп, өңірде күй өнерін дамыту бағытындағы бастамалар жөнінде баяндама жасады.

Одақ төрағасы Асқар Кенжеғалиев Батырбек Байназаровқа осы уақытқа дейін атқарған еңбегі үшін алғыс білдіріп, арнайы медальмен марапаттап, құрмет көрсетті.

Жиын соңында Қостанай облыстық күйшілер одағының жаңа төрағасы болып белгілі күйші, өнер жанашыры Мұрат Хамитов тағайындалды. Ол өз сөзінде алдағы жоспарларымен бөлісіп, облыс көлемінде күй өнерін насихаттау, жас күйшілерге қолдау көрсету, шеберлік сабақтарын ұйымдастыру секілді бастамаларға басымдық берілетінін атап өтті.