Ат үстіндегі адуынды ойын

Қарасу ауданы «Достық» АМҮ ұйымдастыруымен «Рухани жаңғыру» бағдарламасының аясында ұлттық ойындарды насихаттау мақсатында «Дода бұзар қазанат», - атты ұлттық спорттың төресі саналатын Көкпар жарысы ұймдастырылды! Алдымен, ойын аудандық Мәдениет үйінің өнерпаздарының әуелете салған әндерімен, бастау алды. Көпшілікке көтеріңкі көңіл-күй сыйлаған рухты ән шашудан соң, жиналғандардың назары көкпарға ауды. Көкпар десе ішкен асын жерге қоятын қазақ жігіттері ат жалын тарта мініп, салым салуға асықты. Өзара сайыста білекті жігіттер жерде жатқан серкені тақымға қысып, өз командасына ұпай жинау үшін күштерін жұмсады. Ұлттық ойын барысында ат дүбірі толастамай, қызу қанды жігіттер бір-бірін айқын басымдылықпен жеңді және де лайықты қарсылық көрсете білді десек артық айтқанымыз емес. Осынау ұлан-ғайыр кең даланы ата-бабаларымыз білектің күшімен найзаның ұшымен сақтап қалғаны баршамызға ақиқат. Сайын даланы жаудан аман сақтау үшін жауынгер де астындағы тұлпар да бабында болып, жігерлі болуы үшін осы көкпар ойынын өткізіп тұрған. Сондықтан да мұнда тек қана ойын емес үлкен мән-мағына, ұрпаққа деген тәлім-тәрбие жатыр. Көкпар ол біздің рухани құндылығымыз, осы орайда ұлттық спортымыздың жанашырларына айтар алғысымыз шексіз. Ұлттық құндылық ол ұлттың мызғымас байлығы, ендеше осынау асыл мұрамызды сіз бен біз болып жаңғыртуға атсалысайық!