Елбасымыз Нұрсұлтан Әбішұлы Назарбаев қоғамды ұлттық мәдениет пен бірегейлікті сақтау мен қайта жаңғырту идеясының төңірегінде одан әрі топтастыру мақсатында  Ұлттық домбыра күні туралы жарлыққа қол қойып шілденің бірі домбыра күні болып белгіленген еді. Домбыра күнінің белгіленуі жай­дан-жай емес. Бұл рухани жаңғыру бағытындағы ең сүбелі тірліктің бірі десек артық айтқандық емес. Осы күннің аясында ұлттық аспабымызды ұлықтау мақсатында  1 шілде күні Денисов ауданының мәдениет үйінде домбыра күніне арналған фестиваль болып өтті. «Нағыз қазақ қа­зақ емес, нағыз қазақ – домбыра!» деп Қадір Мырза Әлі ағамыз айтқандай  Ұлы ұлт­тың баласы деген атқа сай болайық деген мақсатпен   бізде басқадан қалыспай  шамамыз келгенше осы мерекені атап өттік. Мерекелік іс шараның шымылдығын  «Домбыра үні» атты әнмен Тұрмағанбетова Жаннұр ашты. Лисаков қаласы  және Аудандық мәдениет үйінің  әртістерінен біріккен домбырашылар ансамблі  «Балбырауын» күйін төгілдіріп  халықтың қошеметіне бөленді. Қатысушылардың алғашқысы болып Лисаков қаласынан келген қонағымыз Кенжебаев Мейрамбек «Талас» күйімен сахнаға шықты. Сахнаны толықтырған  қалған қатысушылар өз ауданымыздың өнерпаздары болды. Олар:  «Арынғазы»  күйімен шыққан  Саден Азиза, «Ата толғауы»  күйімен шыққан  Шаймерденова Қадиша шәкірттері Оспанова Арина және Аутенова Назеркемен,  «Ел айырлған» күйін ойнаған  Валиханов Азамат, халық әні «Дүрдаразды»  айтып шыққан Кенжебаев Мейрамбек  көрермен қошеметіне бөленді. Толендин Жантөре Құрманғазының күйі «Адайды» эстрадамен қосып төгілдіріп, «Кеңес» күйімен   Абдрахманов Темирлан, «Салтанат» күйімен    Алгожин Талгат сахнада өнер көрсетіп көрермен көзайымына айналды.
          Фестиваль соңында  жоғарыда өнер көрсеткен домбырашылар ансамблі «Ерке сылқым» күйін тамылжытты.