15 мамыр күні Денисов ауданында да отбасылық мереке өз деңгейінде аталып өтті. Мерекелік іс шараның басы әр жыл сайын  аудан көлемінде өткізіліп келе жатқан дәстүрге айналған «Мерейлі отбасы» байқауымен басталды. Мереке шымылдығын аудандық Мәдениет үйінің «Фаворит» би ұжымы «Көктем» биімен ашты. Аудандық маслихаттың хатшысы Мырзабаев Алпамыс Елтайұлы халыққа құттықтау сөзін арнап «Мерейлі отбасы» байқауының қатысушылары мен жеңімпаздарын марапаттап елдің қошеметі байқау қатысушыларының мерейін көтеріп тастады. Байқауға қатысқандарды атап өтер болсақ он баланың анасы, ауған соғысына қатысушы интернационалист жауынгердің жесірі  Қадамбаева Гүлнар Төлебайқызының, салауатты өмір салтын ұстанған Панин Владимир Николаевичтің, күміс және алтын алқаның иегері тыл ардагерінің жесірі көп балалы ана  Салқымбаева Күлжахан Иманбайқызы, қамқоршылық кеңесінің төрағасы, сайлау комиссиясының хатшысы және Нұр Отан партиясының мүшесі Игисенова Гуля Есболатқызының отбасылары көрермен көзайымына айналды.
Халықаралық отбасы күніне арналған мереке «Отбасы – ұлттың тірегі» атты аудандық отбасылық фестиваліне ұласты. Отбасы мерекесіне қатысушылар сахнадан өздерінің шеберлігін көрсетіп, музыкалық шығармаларды орындап көрермендерге керемет мереке тарту етті. Фестивальді Приреченка ауылынан қатысушы Рахметовтар отбасылық дуэті «Көңілді күн» әнімен ашты. Әрі қарай Қошановтар отбасылық дуэті «Махаббатым менің» әнімен жалғастырса, Перелески ауылынан келген өнерлі Жүркібаевтар отбасылық дуэті көрермендерге өздерінің «Сен менің есімдесің» әнімен шашу шашты. Сонымен қатар, Алшан ауылынан Жубаевтар отбасынан анасымен қызы «Мама» әнімен, Тұрмағамбетовтар отбасылық дуэті «Қыз арманы» әнімен көрермендер қошеметіне бөленді. Ғазезовтар отбасылық дуэті «Бір тілек» әнімен  көпшілікті өнерімен тәнті етсе, Танатовтар  отбасылық дуэті  «Тәуелсіз ел ұраны» әнімен, Жұмабаевтар отбасылық дуэті «Алға Қазақстан!» әнімен халықтың ұлттық рухын оятты. Фестиваль соңы қатысушылардың марапатымен аяқталды.